Walimu watakiwa kusimamia maadili, uwajibikaji

Walimu Wakuu wa shule za sekondari zinazomilikiwa na Jumuiya ya Wazazi Tanzania ya Chama Cha Mapinduzi (CCM), wameagizwa kuhakikisha wanasimamia maadili na uwajibikaji wa waalimu na wanafunzi ili kuwezesha shule  hizo zinazomilikiwa na Jumuiya ya Wazazi kushindana katika ufaulu na shule za serikali nchini.

Hayo yamesemwa na Mjumbe wa Halmashauri Kuu ya Taifa (NEC) ya CCM kupitia Jumuiya ya Wazazi Paulo Kirigiri,  wakati alipokuwa akifungua semina ya siku moja ya Walimu wa shule za Jumuiya ya Wazazi  mkoa wa Kilimanjaro, semina iliyofanyika katika ukumbi wa mikutano wa shule ya sekondari Mwanga.

Kirigiri alisema kuwa ili kuweza kuwa na uimara katika shule za Wazazi, ni lazima kukawa na mpango maalumu wa kuziimarisha shule hizo kwa kuzijengea heshima ili ziweze kupambana katika ubora na ufaulu na shule za serikali.

Alisema kuwa Walimu wakuu wa Jumuiya ya wazazi kote nchini wanatakiwa kuhakikisha kila shule inakuwa na mpango mkakati ili kujua muelekeo wa malengo yaliyopangwa na Jumuiya hiyo katika kutimiza majukumu ya kila siku ya shule zao.

“Nawaombeni sana tusimamie nidhamu mashuleni hususan kwenye shule zetu za wazazi, ili tutengeneze kizazi ambacho ni cha viongozi wenye nidhamu, bila hivyo taifa litapata wala rushwa, mafisadi hii yote ni kutokana na kutokuandaliwa vizuri watoto,”alisema.

Kwa upande  wake Katibu wa Jumuiya ya Wazazi CCM mkoa wa Kilimanjaro, Lugano Mwafongo, aliitaka idara ya ukaguzi wa shule kusimamia ubora wa elimu nchini  kwa kuhakikisha  kuwa sera, sheria, kanuni na viwango vya elimu vilivyowekwa katika mfumo wa utoaji elimu vinazingatiwa ipasavyo  kwa kuhakikisha  mitaala na viwango vya elimu vilivyowekwa vinafuatwa ili kuongeza ufanisi na ubora katika utoaji wa elimu.

“Mratibu  elimu wa Kata kama msimamizi wa shule aliye karibu na shule akisaidiana na mwalimu mkuu ambaye ni msimamizi wa shule wa ndani, kwa pamoja   wana nafasi kubwa sana katika kusimamia elimu katika maeneo yao, kwani wataweza kutayarisha taarifa na kuzitoa kwa wadau  kwa wakati, vilevile zitasaidia wakaguzi wa shule kufahamu mahali gani panahitaji  marekebisho au kutiliwa mkazo.”alisema Mwafongo.

Aidha Katibu huyo alisikitishwa na baadhi ya maafisa wa elimu ngazi ya mkoa wamekuwa sehemu ya kuzisemea vibaya shule za Wazazi, kwa kuwapigia simu wazazi na kuwaambia kuwa wasipeleke watoto kwenye shule za Jumuiya ya Wazazi.

”Sisi kama chama tunazo taarifa, wako baadhi ya maafisa wa elimu ngazi ya mkoa wamekuwa sehemu ya kuzisemea vibaya shule zetu za Wazazi, wamekuwa wakiwapigia simu wazazi na kuwaeleza kuwa wasipeleke watoto kwenye shule zetu za wazazi jambo hilo sio zuri hata kidogo tunayo majina yao na tunatarajia kuyakabishi kwenye ngazi za juu za uongozi,”alisema.

Alifafanua kuwa  wapo maafisa hao wamediliki hata kuzuia matokea ya kidato cha nne ya  shule ya Sekondari Minja kwa kutilia mashaka tu, na baadae wakaja kujua ukweli kuwa matokea hayo yalikuwa na ukweli.