Zifahamu njia 6 za kuondoa mikunjokunjo na michirizi mwilini

Michirizi katika sehemu za mwili imekuwa ikitamkwa na wengi kama ‘stretch marks’ ambapo hutokea sehemu mbalimbali mwilini kama mikononi, miguuni, mapajani au tumboni. 

Michirizi na mikunjokunjo kwenye ngozi ya mapaja, tumbo na kwenye mikono ni tatizo linalowatesa zaidi wanawake. 

Wengi wanahangaika ili kuondokana na tatizo hili bila mafanikio. Pamoja na kutumia vipodozi na cream mbalimbali bado tatizo halijaisha. 

Tatizo linawafanya kina dada kuona aibu, kushindwa kujiachia na kutovaa nguo wanazozitaka kwa kuogopa mikunjo kuonekana. 

Baadhi ya vitu vinavyosababisha mikunjokunjo kwenye ngozi ni pamoja na kuvurugika kwa homoni, pamoja na kutokufanya mazoezi. Tatizo hili huwatokea zaidi wanawake kuliko wanaume kutokana na unene kupita kiasi ambapo sehemu ya ndani yenye mafuta (fat globules) inakua na msuguano na tishu za ngozi na hivyo mikunjokunjo na michirizi kwenye ngozi hutokea.

CHANZO CHA MIKUNJO NA MICHIRIZI

Sababu zinazochangia upate mikunjokunjo na michirizi kwenye ngozi ni pamoja na Lishe mbovu, Mwili kubakiza maji tumboni (fluid retention ambapo wakati mwingie hupelekea tumbo kujaa gesi), 

Damu kutozunguka vizuri, Udhaivu wa tishu zenye Collagen (collagen ni kiungo kilichosheni protini ambacho kinatengeneza shape na tishu za ngozi. Hivyo kufanya ngozi ya mtu kuonekana bado changa) na kufanya kujikunja kiurahisi, Mabadiliko ya homoni, Mwili kukosa mazoezi na kutoshugulika. 

Pia msongo wa mawazo kupita kiasi ambao hupunguza uzalishaji wa collagen, na Historia ya magonjwa mfano magonjwa ya autoimmune, kisukari, watu wanaovuta sigara na wenye alegi/mzio husababisha mikunjo na michirizi hiyo. 

Kwa kawaida, michirizi haimletei mtu maumivu yoyote, bali jambo kubwa huwa ni kuubadili muonekano wa ngozi ya mtu. 

Ikifikia hatua hii kwa namna moja au nyingine humnyima mtu uhuru au humfanya mtu asiwe na amani anapokuwa mbele ya watu kwa kutegemea michirizi hiyo imetokea sehemu gani ya mwili.

NAMNA YA KUONDOA MIKUNJO NA MICHIRIZI: 

Unaweza kuondoa michirizi kwa njia za kiasili kwa kutumia 

1. Kahawa: Mbegu za kahawa zilizokaangwa kiasi robo kikombe. Saga kahawa hiyo. Ukishasaga na kupata ule unga, uchanganye kwenye losheni ya mikono yako na kisha uipake palipo na michirizi. Haina madhara, ipake mara mbili hadi tatu kwa siku. Futa kwa kitambaa na maji ya fufutende (vuguvugu). Mchanganyiko huu pia waweza ukautumia kama ‘facial’ ambayo inasaidia ngozi kutozeeka au mikunjo ya ngozi kupunguka au kumalizika kabisa. 

2. Juisi ya Limao na Tango: Unahitaji limao moja na kipande kidogo cha tango. Chuja juisi ya limao kisha changanya na kipande cha tango na uvisage pamoja. Paka mchanganyiko huu kwenye eneo ilipo michirizi na ukae nayo kwa muda wa dakika 10 kisha osha. Hii ni nzuri pia kuondoa hata madoa usoni kwa wenye ngozi za mafuta. Unaweza itumia usoni pia. Fanya hivi kila siku. 

3. Viazi Mviringo: Unapaswa kuvikata vipande vidogovidogo vya viazi hivyo kisha uvitumie kusugua sehemu yenye michirizi. Tulia kwa muda kisha oga kwa kutumia maji ya ufufutende. Fanya hivi angalau kila siku. 

4. Mafuta ya Nazi: Unaweza kutumia mafuta halisi ya nazi kwa kupaka kwenye ngozi yako baada ya kuoga. Kumbuka cream za madukani zinaweza kuwa ghali na hatari kwa afya yako kwa maana zina kemikali na metali nzito ambazo ni sumu kwa afya ya ngozi. 

5. Kufanya mazoezi: Mazoezi ni njia nzuri sana pale unapotaka kupunguza uzito, tumeona pale juu athari za uzito mkubwa na kitambi kwenye kupata mikunjokunjo, pamoja na kula lishe nzuri ni muhimu sasa uweke ratiba ya kufanya mazoezi walau mara tatu kwa juma. 

6. Lishe Bora: Ni muhimu uzingatia kula lishe bora na kunywa maji mengi; angalau glasi nane kwa siku. Ulaji wa mboga za majani na vyakula vyenye wingi wa vitamini C na E na madini ya Zinc na Silica ikiwamo karoti,spinachi na maharage mabichi pia ni muhimu.