Hali si shwari Moshi Club

Hali ya utulivu katika klabu ya michezo ya Moshi mkoani Kilimanjaro maarufu Moshi Club inaweza kutoweka kutokana na sintofahamu inayoendelea katika kitengo cha mpira wa miguu baina ya wanachama kutokana na mtifuano kuhusu nani mwenye haki ya kuutumia uwanja wa mpira wa miguu.

Hayo yanajiri baada ya wanachama wa Moshi Veterans Club (MVC) kutifuana na wale waliojiengua wanaofahamika kama Uhuru Veterans kwa kile kinachodaiwa na kila upande una haki ya kuutumia uwanja wa mpira wa miguu.

Mtifuano huo umeenda mbali zaidi na kusababisha mara kadhaa mazoezi kusimama kutokana na uwepo wa timu mbili ndani ya uwanja mmoja ambapo kila upande unadai kuwa una haki ya kuutumia hali ambayo imepelekea kauli za vitisho kutoka kwa maveterani hao.

Wakizungumza kwa nyakati tofauti na Tanzania Daima wanachama hao wa Moshi Club walidai walipofikia sasa ni pabaya kutokana na kauli za ubabe na vitisho zinazotolewa na kila upande ikiwamo kutishiana kupasua mipira, kutembea na vitu vyenye ncha kali.

Mwenyekiti wa Maveterani wa Uhuru Robert Saturine alisema wao ni wanachama halali ambao wamelipa stahiki zote za kuwa wanachama wa Moshi Club hivyo wana uhuru kama jina lao lilivyo la kutumia uwanja huo kwa ajili ya shughuli za kimichezo hususani mpira wa miguu.

“Sisi tuna haki ya kutumia uwanja huu na ndio maana tupo hapa, tumelipa ada kama wanachama wengine,” alisema Saturine.

Alipoulizwa kuhusu kufikiwa kwa maridhiano baina ya pande mbili alisema kuwa ni vema wakaketi kitako kujadili suala hilo kwa pamoja badala ya kutupia vijembe na maneno licha ya kuendelea kusimamia msimamo wao wa kuwa na haki ya kuutumia uwanja huo.

Kwa upande wake Katibu wa Moshi Veterans Moses Chalamila alisema kinachofanyika sasa ni ubishi wa hao waliojiengua kwani kuwa mwanachama wa Moshi Club hakutoi nafasi ya moja kwa moja kkwa mwanachama kufanya kila kitu anavyojitakiwa kwani kuna utaratibu kwenye kila kitengo ambapo mwanachama husika atapaswa kuufuata.

“Ukishalipa laki moja ambayo ndio ada ya uanachama wa hapa Moshi Club hakutoi nafasi ya mwanachama kufanya kila kitu, kila kitengo kama gofu, tenisi, football ukiingia kuna utaratibu ambao mtu atatakiwa aufuate ili aweze kuishi na wenzake katika kitengo husika, sasa wanachokifanya hao (Uhuru) ni ubishi na ubabe jambo ambalo si jema,” alisema Chalamila.

Hata hivyo Meneja wa Moshi Club Michael Mtenga alisema jambo hilo analifahamu lakini hataweza kulizungumzia kwasababu yupo kwenye msiba akirudi ndio atafafanua kwa kina kuhusu sintofahamu hiyo.

Chokochoko za pande hizo zilianza kujitokeza mwishoni mwa mwaka 2019 baada ya baadhi ya wanachama kujiengua kutoka MVC na kuanzisha Uhuru Veterans kutokana na kushindwa kukubaliana baadhi ya mambo hali ambayo imesababisha sintofahamu hiyo katika kitengo hicho cha mpira wa miguu.