Fahamu maisha ya Benito Mussolini katika ardhi ya Uswisi kabla hajaiteka Italia

Juni 19, 1903 ambapo Benito Mussolini wakati huo akiwa mwanamapinduzi wa Kisoshalisti alikamatwa na Polisi wa Bern huko Uswisi kwa kuwa chanzo cha kuanzishwa kwa mgomo.

Mwanasiasa na mwandishi wa habari huyu wa Italia ambaye baadaye alikuja kuwa kiongozi wa taifa la Italia kwa mabavu (1922-1945) alienda nchini Uswisi kwa ajili ya kufanya kazi zake za uandishi wa habari.

Alikimbilia nchini Uswisi baada ya kugundua kwamba hali haikuwa shwari nchini mwake kutokana na kubeba itikadi za kisoshalisti ambazo kama kijana zilimkaa vilivyo.

Juni 1902 alikimbilia nchini Uswisi baada ya kutua katika ardhi hiyo alifanya kazi kama mfyatua matofali na shughuli za ujenzi pia mwandishi wa habari baadaye akajiunga na vyama vya kibiashara kuendeleza harakati zake.

Mussolini akiwa nchini Uswisi alikuwa imara katika vuguvugu la Kisoshalisti wakati huo akifanya kazi na gazeti la L’Avvenire del Lavoratore, akiratibu mikutano, kutoa hotuba na kuhudumu katika nafasi ya Katibu kwenye Chama cha Wafanyakazi wa Kiitaliano mjini Lausanne.

Mnamo Juni 1903 alikamatwa na polisi kwa ajili ya ushauri wake ambao ulisababisha vurugu kubwa. Mussolini alitupwa jela kwa majuma mawili kisha akarudishwa nchini Italia lakini baadaye alirudi tena nchini Uswisi.

Aliporudi mnamo mwaka 1904 alikamatwa tena mjini Geneva kutokana na kudanganya nyaraka zake hivyo ikabidi aende zake huko Lausanne ambako alienda kusoma Chuo Kikuu katika Idara ya Sayansi ya Jamii baada ya kupata ushauri  mzuri na Vilfredo Pareto ambaye alikuwa mhandisi wa Italia, mchumi, mwanasayansi, mwanasiasa na mwanafalsafa.

Desemba 1904 alirudi nchini Italia ambako alijiunga na vikosi vya jeshi  vya Bersaglieri huko Forli. Baada ya miaka miwili ya kuwapo jeshini kutoka Januari 1905 hadi Septemba 1906 alirudi zake kufundisha.

Baada ya kuondolewa jeshini, Mussolini aliandika na kuhariri magazeti kadhaa ya kisoshaliti na alikuwa akichukuliwa kuwa ni nyota inayokuja kwa kasi yenye mrengo wa kushoto nchini Italia.

Benito Mussolini alikuwa mtoto wa kiume wa Alessandro Mussolini ambaye alikuwa mhunzi na mfanyabiashara wa zana za chuma pia mrengo wa kulia wa itikadi za kisoshaliti na mpinzani wa Ukatoliki. Mama yake alikuwa mwalimu na mwamini wa Ukatoliki asiyeyumba.

Licha ya wazazi wake kuwa na mtazamo tofauti katika dini lakini walioana na kuzaa watoto watatu. Benito alikuwa mtoto wao wa kwanza. 

Jina ambalo alipewa baada ya watu watatu wenye itikadi za Usoshalisti Benito Amilcare Andrea Mussolini kumsaidia baba yake kufanya kazi kwa siri na kurithi mawazo ya mwanasiasa Alessandro ambaye alikuwa mzalendo, mwenye mrengo wa kulia na kisoshalisti