MAKTABA YA JAIZMELA: Joe Jackson ni nani?

Juni 27, 2018 alifariki meneja mwenye kipaji na mwangalizi wa familia ya Jackson ambayo ilikuwa na watoto vipaji katika muziki kama Michael na Janet raia wa Marekani Joe Jackson. 

Juni 22, 2018 iliripotiwa na mtandao wa TMZ kuwa Jackson amelazwa katika hospitali moja mjini Las Vegas kutokana na maradhi ya saratani ya kongosho. Hali yake ilikuwa mbaya kwani saratani hiyo ilikuwa imeshambulia kwa kiasi kikubwa.

Alifariki dunia akiwa na umri wa miaka 89 siku mbili tu baada ya kumbukizi ya tisa ya kifo cha mtoto wake Michael Jackson huku ikiwa ni siku 30 kabla ya kufikisha miaka 90.

Alifariki dunia kwa amani akiwa amezungukwa na mkewe na watoto wake. Jackson aliingizwa katika Jumba la Wakongwe wa muziki wa Rhythm na Blues mnamo mwaka 2014.

Jackson alikuwa na ndoto ya kuwa mpiganaji wa masumbwi  na baadaye alianza na kadhia hiyo na kuanza kupiga gitaa akiwa na kundi la The Falcons. Akiwa huko aligundua kwamba ana watoto ambao wana vipaji vya muziki huku akimwona kwa ukamilifu mwanaye Michael Jackson.

Baada ya hapo alipambana hadi kuunda miongoni mwa makundi makubwa ya pop ‘The Jackson Five’ ambalo liliweka wazi kipaji cha mwanaye huyo na binti yake Janet.  Mzee huyo aliwahi kunyoshewa kidole cha lawama na watetezi wa haki za watoto kwamba aliwatesa watoto wake, madai hayo aliwahi kuyasema pia Michael Jackson katika kitabu chake.

Hata hivyo Janet aliwahi kumtetea baba yake kuwa alikuwa akifanya hivyo kwani alikuwa anataka wawe bora zaidi. Janet alisema hata kama hakutumia wakati mwingine njia sahihi lakini ndiye anasalia kuwa msingi wa mafaniko yao.

Mwanaye mwingine La Toya alikaririwa akisema, “Siku zote nitakupenda wewe! Ulitupa uimara, ulitufanya kuwa miongoni mwa familia maarufu sana hapa ulimwenguni. Hakika ninakukubali, sitasahau nyakati tulizokuwa pamoja na namna ulivyokuwa ukiniambia na kunijali.”

Jina lake halisi ni Joseph Walter Jackson. Alizaliwa huko Fountain Hill Arkansas Julai 26, 1928. Alikuwa mtoto mkubwa kati ya wanne wa Samuel Joseph Jackson (1893-1993) aliyekuwa mwalimu wa shule na mama Crystal Lee King (1907-1992).

Alipokuwa na miaka 12 wazazi wake walitengana na baba yake akaenda zake Oakland, California. Akiwa na umri wa miaka 18 alikwenda kuishi huko Indiana karibu na mahali alipokuwa akiishi mama yake East Chicago.

Joe Jackson alifanikiwa kuzaa watoto 11 miongoni mwa hao 10 ni kutoka kwa Katherine Scruse.  

Watoto hao ni Maureen Reillette "Rebbie" Jackson (Mei 29, 1950), Sigmund Esco "Jackie" Jackson (Mei 4, 1951), Toriano Adaryll "Tito" Jackson (Oktoba 15, 1953), Jermaine La Jaune Jackson (Desemba 11, 1954), LaToya Yvonne Jackson (Mei 29, 1956), Marlon David Jackson (Machi 12, 1957), Brandon David Jackson (Machi 12, 1957 - Machi 12, 1957), Michael Joseph Jackson (Agosti 29, 1958 – Juni 25, 2009), Steven Randall "Randy" Jackson (Oktoba 29, 1961), Janet Damita Jo Jackson (Mei 16, 1966) na Joh'Vonnie Jackson (Agosti 30, 1974).