Viongozi wapya Prosperity Vicoba Group watakiwa kuwa macho

Watu waliojiunga katika vikundi mbalimbali vya kuweka na kukopeshana fedha (VICOBA) wametakiwa kuchukua tahadhari na kuwa makini zaidi katika masuala yanayohusu usimamizi wa fedha ili kuondokana na tatizo la wizi ama upotevu wa fedha zao.

Akizungumza na uongozi mpya wa kikundi cha Prosperity Vicoba Group (PVG) mjini hapa, kwa niaba ya Mrajisi wa Vyama Vya Ushirika Mkoani Kilimanjaro John Henjewele, Afisa Ushirika Wilaya ya Moshi Vijijini Eliona Omari alifafanua kuwa viongozi walioingia madarakani lazima wafuatilie utekelezaji wa shughuli walizozipanga na wanachama hao na kufanya tathmini za mwaka mzima.

Aliwataka viongozi na wanachama wa kikundi hicho kuhakikisha kuwa, fedha zinazotolewa na halmashauri  zinawekewa mikakati na miradi ya pamoja ili kufanikisha malengo yaliyokusudiwa ya uchukuaji wa mikopo hiyo.

“Kinachoua hii miradi ni kutokuweka mikakati ya pamoja ya kuhakikisha miongozo na taratibu zilizopo zinafuatwa kama sehemu ya usimamizi makini wa fedha, hivyo uongozi uhakikishe unazingatia miongozo hiyo na taratibu zilizopo za udhibiti wa fedha,” alifafanua Omari.

Aliendelea kufafanua kuwa, ili mwanachama aweze kuchukua mkopo wake ni vyema akawa na malengo madhubuti ya fedha hizo na ikiwa ataona lengo hilo halitafanikiwa ni bora kuacha kuchukua mkopo huo.

Kwa upande wake Mwenyekiti wa Kikundi cha Prosperity Vicoba Group (PVG), Bahati Nyakiraria aliwataka wanachama wake kuisoma katiba na kuielewa vizuri kwani wengi wamekuwa hawasomi, ili kutambua haki na wajibu wao.

“Msiwe watu wa kuja na kuweka Hisa zenu tu, pia kuna haki zako lakini pia kuna haki za kulinda wenzako, kuna utaratibu wa kufahamu kikundi kinaendeshwaje, wajibu wako na wajibu wa kikundi,” alifafanua Nyakiraria.

Naye Mwezeshaji wa kikundi hicho, Bi. Devotha Membe aliwataka wanakikundi kukopa kwa malengo waliyoyakusidia kwani wana Vicoba wengi wameingia kwenye madeni makubwa kutokana na wengi wao kuwa na vikundi vingi na wamekuwa wakikopa fedha kundi kimoja na kwenda kulipa deni kwenye kikundi kingine jambo ambalo limesababisha baadhi yao kukamatiwa mali zao.

Viongozi waliochaguliwa ni Bahati Nyakiraria Mwenyekiti, Katibu Samuel Shao, Mweka hazina Kennedy Massawe, wengine ni Ester Kimario, Irine Mushi, Victoria, Salome Minja, Winfrida Nyella na Emma Mushi.