Unaikumbuka Vita ya Sisak Juni 22, 1593

Juni 22, 1593 kuliibuka vita baina ya majeshi ya Ottoman chini ya Kamanda Telli Hassan Pasha ambaye alikuwa maarufu katika ukanda wa Eyalet huko Bosnia na majeshi ya muungano ya Kikristo kutoka ardhi ya Habsburg (Croatia na Austria).

Vita hiyo ilipiganwa katika eneo la Sisak katikati ya Croatia ambapo kuna maungio ya mito ya Sava na Kupa. Mapema mwaka 1591 na 1592 majeshi ya Ottoman yalishindwa mara mbili jaribio la kutaka kuichukua Sisak lakini walifanikiwa kuichukua Bihac mnamo mwaka 1592.

Ngome ya Sisak ilianza kuzungukwa tena mnamo Juni 15, 1593. Makamanda wa Kijeshi wa Sisak Blaž Đurak na Matija Fintić wote walikuwa ni kutoka katika wilaya ya Zagreb. Jeshi likiwa chini ya Kamanda Mkuu Jenerali Ruprecht von Eggenberg kutoka Austria lilikusanyika haraka ili kuharibu mipango ya Kamanda Pasha.

Majeshi ya Croatia yalikuwa yakiongozwa na Thomas Erdody na yale ya Carniola na Carinthia yaliongozwa na Andrea von Auersperg ambaye alikuwa akifahamika kama Carniolan Achilles.

Majeshi hayo ya Sisak yaliwafanyia ‘surprise’ yaani shambulio la ghafla wakiwa bado wapo pembezoni mwa ngome hiyo na kuyazabua majeshi ya Ottoman.

Kichapo hicho kilikuwa mwanzo wa vita ya muda mrefu ya miaka 13 kutoka mwaka 1593 hadi 1606. Majeshi ya Ottoman yaliyokung’utwa siku hiyo yaliwapa jina la utani majeshi ya muungano kama “Walinzi wa Ukristo”.