Juan Carlos Ramirez Abadia muuzaji dawa za kulevya aliyejibadili sura asifahamike

Jina halisi la mfanyabiashara huyo wa dawa za kulevya ni Juan Carlos Ramírez Abadía maarufu kwa jina la Alias Chupeta. Hadi kukamatwa kwake alikuwa miongoni mwa viongozi wakubwa wa genge la Norte del Valle Cartel. Genge hili lilijizolea umaarufu mkubwa kutokana na mauaji na uuzaji wa dawa haramu za kulevya nchini Marekani.

Chupeta alikuwa mfanyabiashara wa dawa za kulevya aina ya Cocaine. Inaaminika kwamba Chupeta alikuwa akijihusisha na utapeli wa fedha na uuzaji wa dawa haramu za Heroin. Chupeta ni raia wa Colombia.

Alizaliwa Februari 16, 1963 huko Palmira. Mkurugenzi wa Idara moja nchini Marekani Adam J. Szubin aliwahi kukaririwa akimtaja Chupeta kama mmoja wa wafanyabiashara wa dawa wenye nguvu na mgumu sana huko Colombia.

Chupeta alitupwa jela nchini Colombia mnamo mwaka 1999 hadi 2002 baada ya kujisalimisha kwenye mamlaka. Kinachostaajabisha zaidi alipotoka jela ni pale alipofanya upasuaji katika uso wake ili kuondoa sura yake na kuiweka mpya. Agosti 7, 2007 alikamatwa jijini Sao Paulo nchini Brazil katika eneo la Aldeia da Serra.

Alihukumiwa miaka 30 jela nchini Brazil mnamo Aprili 2008. Mnamo Machi 13, 2008  Mahakama ya Juu nchini Brazili ilitoa hati ya kumkabidhi kwa mamlaka za Marekani. Tukio hilo lilikuja kufanyika Agosti 22, 2008.

Baada ya kukabidhiwa kwa mamlaka za Kisheria za Marekani alitoa ushahidi wa kuwa mshirika wa karibu wa Joaquin “El Chapo” Guzman ambaye ni mfanyabiashara mashuhuri wa dawa za kulevya raia wa Mexico.

Chupeta aliziambia mamlaka hizo kuwa hakumbuki matukio aliyoyafanya  akikodiwa na El Chapo kupitia Sinaola Cartel. Kwa sasa Chupeta ana umri wa miaka 57 akiwa mikononi mwa vyombo vya dola.