Hivi Rais ulitukataza tusile Pilau msibani?

Nianze na kutoa shukrani zangu za dhati kwa Rais wa Jamhuri Muungano wa Tanzania John Pombe Magufuli huwa napendelea kumwita JPM, kwa kile ambacho umekifanya kuruhusu kwa awamu suala la wanafunzi kurudi kwenye masomo yao, hilo ni jambo jema.

JPM umekuwa kitovu cha habari zote ulimwenguni kuhusu msimamo wako pale ulipopeleka mapapai na sungura kwenye ile mashine yetu na vikabaini kuwa na vyenyewe vina ugonjwa wa Covid-19 isipokuwa haukutupa taarifa kama na vyenyewe viliwekwa karantini. Kilichofuata ukaikarabati ile maabara tu.

Leo nisingependa kujikita katika mtazamo huo wa watu wa nje ambao kila wakati wanataka tutazame masuala kama ambavyo wao wamekuwa wakitazama (Eurocentric view).

Hapo ndipo ninapomkumbuka Li Peng aliyekuwa akifahamika kwa jina la ‘Bucha la Beijing’ wakati wa maandamano ya kushinikiza masuala kadhaa yaliyofanywa na wanafunzi pale Tiananmen Square mnamo mwaka 1989. Walitulia pale kwa miezi mitatu hatimaye Juni 4 ya mwaka huo walijua kwanini aliitwa ‘Bucha la Beijing’. Lakini msimamo wake ulisaidia kuifanya China iwe hivi kwa kiasi tunavyoiona hivi leo kwa maana yeye alitazama kwa mtazamo wa Kichina kuhusu wapi China anataka ifike.

Nijikite katika hili janga la Corona hapa nchini kwetu, nafurahi kusikia umerudisha wanafunzi vyuoni na utaendelea kwa kadiri utakavyoona hali inavyokwenda.

Binafsi nirudi katika suala la misibani, tunafahamu kuwa binadamu tukishazaliwa lazima tufe lakini tunaobaki huwa tuna taratibu za kuwahifadhi marehemu wetu.

Sasa tangu janga la corona ambalo pia limeikumba nchi yetu taratibu zimebadilika kidogo ikiwamo ya idadi ndogo ya washiriki wa tukio hilo ambayo imekuwa ikizingatiwa.

Ningependa kujua kama ulitukaza hata tusinywe maji ya msibani na pia kwa idadi yetu wachache wakati wa kuzika hata pilau tusile eti kisa corona.

Sijasikia popote ukitoa maelekezo kwa viongozi wa vitongoji, vijiji na kata au hata wakurugenzi au wakuu wa wilaya na mikoa kuhusu hili la kula na kunywa msibani.

Chonde chonde JPM tuweke sawa na hili nalo tunahitaji majibu maana sasa hivi ujue watanzania wanakusikiliza wewe tu kuhusu utakalosema. Hata Makonda mwenyewe hasikilizwi kama unavyosikilizwa wewe.

Litolee maelezo maana misiba huku kwetu ni kila siku. Viongozi wanafika asubuhi kuhakiki kama tumepika pilau letu kwa ajili ya msiba na maji na wanatoa maelekezo hakuna kunywa maji msibani.

Nakumbuka uliwahi kusema tuzaliane tuijaze Tanzania yetu kweli wengi wanaendelea kulitendea kazi, sasa kwetu tupo kumi bado shangazi na kina mjomba hawajafika na wakwe kama kumi na tano hivi.

Kabla ya msiba tulikuwa tukipika pilau lakini wakawa hawaji  kukagua kama maambukizi yanaweza kutokea. Hivi sasa tu kwenye msiba tupo kumi wakati wa kuzika tayari vikwazo kama vyote. Litolee majibu maana nionavyo wamekuwa waoga na wanafiki kupitiliza.

Halafu JPM huku kwetu pia mahindi yameanza kutoa mbelewele najua unafahamu siku nyingi, kipindi kama hiki kwa baadhi yetu lazima tukohoe kutokana na unga unga ule wa mbelewele sasa sijui na lenyewe hili tusaidie japo kidogo kutupa maelekezo tusije tukashikwa vikohozi kisha viongozi wako ambao wamekuwa wakifuata maagizo yako na wakati mwingine wamekuwa wakipitiliza wakapitiliza kwelikweli.

Kwa mfano kama chuo kipo karibu na shamba la mahindi na upepo ukawa unavuma kuelekea darasani au mabwenini au walikopanga wanafunzi hao na ungaunga wa mbelewele ukaenda huko.

Itakuwa tafrani darasani humo JPM nakueleza na penyewe wametoka kurudi baada ya vyuo kufungwa. Hapatatosha.

Pia nimesikia hata hospitalini ukipelekwa wauguzi wanasema, “…tubu kabisa, muombe Mungu akusamehe dhambi zako zote…,” sasa hapo mgonjwa atapona kweli maana kila ukiumwa basi ni corona.

Kama utaona inafaa basi funga tu mjadala huu wa corona kwa kuruhusu kila kitu kifanye kazi kama mwanzo tubaki kumtumainia huyu Mungu na akili zetu za mbayuwayu, maana kama imefikia hatua naambiwa nitubu dhambi zangu zote ninapofikishwa hospitalini hii ni hatari.