MAKTABA YA JAIZMELA: Mandla Maseko ni nani?

Julai 6, 2019 alifariki mwanaanga wa kwanza mwafrika kudhamiria kwenda katika anga za juu raia wa Afrika Kusini Mandla Maseko.

Alifariki dunia akiwa na umri wa miaka 30 jijini Pretoria. Alifariki dunia kwa ajali ya pikipiki. Alizaliwa huko Soshanguve nchini Afrika Kusini kaskazini kwa jiji la Pretoria mnamo Agosti 27, 1988. Alikuwa mtengenezaji wa vifaa vya moto na mfanya usafi katika shule.

Pia alikuwa mwanafunzi wa Jeshi la Anga la Afrika Kusini. Akiwa katika jeshi la Anga alikuwa rubani wa ndege ambaye alikuwa na cheti cha kuongoza ndege peke yake (PPL). Alikuwa DJ na pia mwendesha mzuri wa pikipiki.

Mnamo mwaka 2013 alikuwa miongoni mwa washindi 23 walioingia katika mashindano katika Akademi ya Axe Apollo Space. Mamilioni ya washiriki walishiriki mashindano hayo ambaye Maseko alipata nafasi ya kwenda nchini Marekani katika Akademi ya Masuala ya Anga ya Marekani ili awe Mwafrika wa kwanza kwenda katika anga za juu.

Alikuwa akifahamika kwa jina la Afronaut au Sapceboy. Alikwenda Kennedy Space Center mjini Florida kwa juma moja kwa ajili ya majaribio kama vile skydiving na safari inayofahamika kama Reduced-Gravity Aircraft pia mpango wa saa moja wa suborbital flight katika chombo aina ya XCOR Lynx Mark II ambayo ilipangwa kufanyika mwaka 2015 licha ya kwamba mpango huo haukufanikiwa kutokana na waratibu wa safari hiyo ya mwezini XCOR Aerospace kufilisika mnamo mwaka 2017.

Maseko alirejea kikosini na kufanya kazi kama rubani wa kujitegemea. Kila alipokuwa akipata muda alikuwa Dj na pia aliendesha baiskeli.

Maseko aliwahi kusema alitaka kufanya jambo ambalo litawapa msukumo vijana wa kiafrika na kuwathibitishia kuwa wanaweza kufanikiwa kwa chochote bila kujali walipotoka. 

Angefanikiwa Maseko angekuwa raia wa tatu wa Afrika Kusini kuwenda katika anga za juu baada ya Mark Shuttleworth mwaka 2002 na Mike Melvil mnamo mwaka 2004. 

Maseko alifariki dunia kabla ya ndoto yake kuwa kweli.