MAKTABA YA JAIZMELA: Dennis Brown ni nani?

Julai 1, 1999 alifariki dunia mwanamuziki wa reggae raia wa Jamaika Dennis Emmanuel Brown. Alikuwa msanii wa reggae katika lovers rock. Alifariki dunia akiwa na umri wa miaka 42. Alizikwa Julai 17, 1999 jijini Kingston. Enzi za uhai wake alirekodi zaidi ya santuri 75 na kuwa miongoni mwa nyota wa reggae ulimwenguni.

Mwishoni mwa miaka ya 1990 afya ya Brown ilianza kutetereka. Alikuwa akisumbuliwa kwenye mfumo wa upumuaji huenda ilitokana na kuwa mraibu wa dawa za kulevya aina ya cocaine. Matatizo hayo yalimfanya apate homa kali Mei 1999 wakati wa ziara yake ya muziki nchini Brazil akiwa na wanamuziki wengine wa reggae.

Akiwa huko alipatwa na kichomi, baada ya kumaliza ziara hiyo alirudi Kingston na jioni ya Juni 30, 1999 alikimbizwa katika hospitali ya Chuo Kikuu cha Kingston kutokana na kupata shambulio la moyo. Brown alifariki dunia siku iliyofuata na taarifa rasmi ilisema nyota huyo wa muziki alifariki dunia kutokana na kile kilichoelezwa kuwa mapafu yalishindwa kufanya kazi.

Wakati huo Kaimu waziri Mkuu P. J Patterson na waziri mkuu wa zamani wa Jamaika iliyokuwa mikononi mwa kiongozi wa upinzani Edward Seaga wa chama cha Labour walizungumza katika mazishi yake yaliyofanyika Kingston.

Ibada ya mazishi ilichukua takribani saa tatu ambayo ilikwenda sambamba na uimbaji wa wasanii Maxi Pries, Shaggy na watoto watatu wa kiume wa Brown. Alizikwa katika makaburi ya Mashujaa wa Taifa hilo jijini Kingston. Wakati anafariki dunia alikuwa ameacha mke mmoja Yvonne na watoto 10.

Waziri Mkuu Patterson alitoa salamu zake za rambirambi na kusema, “Kwa miaka mingi, Dennis Brown alijipambanua yeye mwenyewe kuwa miongoni mwa wasanii wazuri na wenye kipaji katika zama zetu. Alikuwa akijiita Crown Prince (mwanamfalme) wa Reggae. Ametuacha na nyimbo nyingi ambazo zitaendelea kuhuisha mioyo na akili zetu na kwa vizazi vijavyo.”

Uimbaji wake umekuwa chachu ya kuwapo kwa wasanii wengi wa reggae miaka ya 1970 hadi 2000 wakiwamo Barrington Levy, Junior Reid, Frankie Paul, Luciano, Bushman, na Richie Stephens.

Mnamo Julai 1999 kundi la wanamuziki nchini Uingereza likiwa na waimbaji waliokuwa wakifanya kazi chini ya jina la The Bristish Reggae All Stars wakiwamo Mafia & Fluxy, Carlton "Bubblers" Ogilvie, Peter Hunnigale, Louisa Mark, Nerious Joseph, na Sylvia Tella walitengeneza wimbo wa pamoja ikiwa ni salamu za rambirambi kwa mwanamuziki huyo.

Kabla ya kifo chake mnamo mwaka 1999 Brown alitoa santuri tatu ambazo ni Believe in Yourself (Don One/TP), Bless Me Jah (RAS/Charm) na Generosity (Gator). Santuri yake ya kwanza aliitoa mnamo mwaka 1970 ambayo ni ‘No Man is an Island’ (Studio One).