TLP yasisitiza upinzani haujaenda likizo, uko imara

Chama cha TLP kimeendelea kusisitiza hatua yake ya kumteua Rais John Pombe Magufuli kuwania urais licha ya kunyoshewa kidole cha lawama na watu mbalimbali kuhusu uamuzi wake kilichoamua kupitia halmashauri kuu ya chama hicho mnamo Julai 2019 huku kikikazia mwanachama wa Chama cha Mapinduzi (CCM) aliyevuliwa uanachama wa Bernard Membe kuwa hapaswi kupata kura zaidi ya 10 katika kinyang’anyiro hicho mwaka huu.

Mbali na hilo chama hicho kimedai kuwa upinzani nchini haujaenda likizo upo imara na kukanusha taarifa mbalimbali zinazoelekezwa kwao kuhusu hatua ya kumuunga mkono Magufuli kuwa wao ni vibaraka wa CCM.

Hayo yalijiri wakati Mwenyekiti wa TLP taifa Dkt. Augustino Lyatonga Mrema alipokuwa akitangaza azma ya chama chake kuingia katika uchaguzi wa mwaka huu kushindana na vyama vingine kwenye ngazi ya udiwani wa Moshi Mjini.

Mrema alisema wao kama TLP sio vibaraka katika kuamua hivyo katika nafasi ya urais isipokuwa uzalendo ndilo jambo kubwa lililowasukuma kufanya hivyo baada ya kuona kazi zinazofanywa na Rais John Pombe Magufuli.

“Tulichukua ilani ya TLP tukaona serikali ya Magufuli imetekeleza, sio kwamba hatuna mgombea tunaye. Lakini Magufuli hana mbadala tukakubaliana kidemokrasia, sasa wengine wanafikiri kwasababu Mheshimiwa Rais alinipa uenyekiti wa bodi ya Parole eti kwamba mimi nalipa fadhila. Jamani mnanionea,” alisema Mrema.

Aidha Mrema aliwataka wana CCM wasimame kidete kulinda kura zao na wao kama  TLP watahakikisha CCM haipotezi kura yake endapo Membe ataingia kwenye kinyang’anyiro hicho kwani ni miongoni mwa watu ambao wamekuwa na kiburi kutokana na fedha walizonazo hali ambayo inaweza kuyumbisha demokrasia ya Tanzania akipewa nafasi ya kuongoza nchi.

“Membe kwanini apate kura hata kama ni kumi, CCM lazima watuambie imekuwaje Membe apate hizo? Nasikia kuna pesa zinakuja Tanzania kupitia Kenya kwa  njia za siri kwa ajili ya uchaguzi huu, hizo zitayumbisha demokrasia ya nchi yetu, Tunataka upinzania ambao utakuwa ukikosoa serikali bila kutukana,” alisisitiza.

Mbali na hilo Mrema alisema katika kata 21 moja za Moshi Mjini wamesimamisha madiwani 11 katika kata ili kuonyesha kwamba wao wanaweza kufanya vizuri kama vyama vingine kutokana na wagombea wake.

“Wapinzani wako hawajaenda likizo na sio kwamba Magufuli atapita kirahisi, katika ngazi za udiwani tunasimama imara kushindana ipasavyo,” aliongeza Mrema.

Kata ambazo TLP imesimamisha wagombea kwa tiketi ya chama hicho ni Njoro, Mji Mpya, Ng’ambo, Kiboriloni, Bondeni, Boma Mbuzi, Pasua, Nganga Mfumuni, Majengo, Miembeni na Longuo.

Katika mkutano wake na wanahabari Mrema aliwakaribisha wanachama waliokimbia Chama cha Demokrasia na Maendeleo (Chadema) na kuwania udiwani kwa tiketi ya TLP ambao ni Thomas Senzige (Mji Mpya), Petro Mbonea Mbwambwo (Bondeni), Severin Jacob Dafi (Njoro Sokoni) na  Rajab Yassin Magema (Ng’ambo).

Aidha Mrema aliwasisitizia wagombea wake kuwa ushindi wao unaanza na mwonekano wao na ilani ya uchaguzi ya chama na namna chama kilivyojipanga kifedha ndio sababu ya ushindi wao.