James Monroe: Mwanzilishi wa sera za kigeni za Marekani

James Monroe alizaliwa Aprili 28, 1758 huko Westmoreland, Virginia na akafariki dunia Julai 4, 1831 jijini New York. Alifariki dunia akiwa na umri wa miaka 73 ukiwa ni mwaka mmoja baada ya mkewe kufariki dunia. Monroe alizikwa katika makaburi ya Hollywood huko Oregon Hill, Virginia.

Monroe ni miongoni mwa marais watatu waliofariki Julai 4 kwa miaka tofauti walioliongoza taifa la Marekani. Wengine ni Thomas Jefferson na John Adams. Pia watatu hawa ndio waanzilishi wa taifa la Marekani.  Monroe alikuwa Rais wa tano wa Marekani.

Aliliongoza taifa hilo kutoka mwaka 1817 hadi 1825. Monroe anakumbukwa kutokana na umuhimu kwa Marekani hususani sera za kigeni za taifa hilo.

Mpaka sasa Maandiko ya Monroe ndio yanayoongoza taifa hilo katika sera za nje ambapo aliyaonya mataifa ya Ulaya kuingilia masuala ya Magharibi. Kipindi alichokuwa akiongoza taifa hilo kilikuwa kikifahamika kama ‘Zama za Hisia Nzuri’ (Era of Good Feelings).

Wananchi wa Marekani walikiita hivyo huenda kutokana na namna Utawala wa James Madison ulifanya kisha namna Monroe alivyoweza kusuluhisha baadhi ya mambo ambayo yalikuwa yakienda mrama wakati wa Madison.

Pia vyanzo vingine vinasema kauli hiyo ilianza kutumika kuanzia mwaka 1815 baada ya kuisha kwa vita vya Napoleoni, kwani raia wa Marekani walianza kuishi kwa raha na kutoyaangalia mataifa ya Ulaya katika masuala ya kisiasa na kijeshi. Monroe alipitisha msimamo huo wa sera za kigeni za taifa hilo mnamo Desemba 2, 1823 wakati akilihutubia Bunge la Kongresi.

Monroe alitangaza kwamba Dunia ya zamani na Dunia Mpya zina mifumo tofauti na zinatakiwa zisalie kuwa tofauti. Monroe alichanganua kauli hiyo katika maeneo manne.

1. Marekani haitaingilia masuala ya ndani au vita vya mataifa ya Ulaya.

2. Marekani inayatambua na kwamba haitaingilia makoloni yaliyokuwapo na utegemezi wao katika ardhi hiyo.

3. Upande wa Magharibi utasalia kwa ajili ya ukoloni ujao. 4. Jaribio lolote ambalo litafanywa na taifa lolote kutoka Ulaya kwa ajili ya kutaka kushikilia eneo lolote katika bara la Amerika litachukuliwa kama ni kitendo cha uhasama dhidi ya Marekani. Monroe aliingia madarakani akiwa katika muungano wa vyama vya Democratic-Republican ulioasisiwa na Jefferson.

Monroe alizaliwa kwa baba kutoka Uskochi aliyefahamika kwa jina la Spence Monroe na mama kutoka Wales Elizabeth Jones. Familia yao ilikuwa ya kikabaila ambayo ilimiliki kiasi cha ekari 600 huko Virginia.

Akiwa na umri wa miaka 16 aliingia katika chuo cha William & Mary lakini mwaka 1776 aliondoka kwa ajili ya kwenda vitani kupigana kwa ajili ya Mapinduzi ya Marekani.

Akiwa Luteni alipita katika maeneo ya Delaware akiwa na Jenerali George Washington katika vita ya  Trenton. Katika vita hiyo Monroe aliumia bega vibaya sana, hivyo akaondolewa katika uwanja wa vita. Baada ya kupona alirudi na kupandishwa cheo kwa ushujaa wake katika vita akawa Captain.

Akiwa katika cho kipya alipigana katika vita vya Brandywine na Germantown. Alipanda tena katika cheo na kuwa Meja na akawa msaidizi wa Jenerali William Alexander aliyefahamika sana kwa jina la Lord Stirling.

Akiwa na Lord Stirling walipambana katika hali ya taabu sana wakiwa na majeshi kwenye bonde la Forge wakati wa majira ya baridi mnamo mwaka 1777-1778. Pia Monroe alikuwa skauti wa Washington wakati wa vita vya Monmouth na wakati huo huo alikuwa akimsaidia Jenerali Lord Stirling katika masuala ya utawala wa kijeshi.

Mnamo mwaka 1780 Monroe alijiuzulu kufanya kazi na jeshi  na alianza kusoma masomo ya Sheria akiwa mikononi mwa Thomas Jefferson ambaye wakati huo alikuwa gavana wa Virginia na wawili hao walitengeneza muungano ambao ulikuwa wa kweli na imara.

Ukaribu wake na Jefferson ulikuwa na maana zaidi kwa Monroe katika masuala ya siasa za Marekani kwani alikutanishwa na kuwa marafiki wakubwa na James Madison.