MAKTABA YA JAIZMELA: Dennis Johnson ni nani?

Februari 22, 2007 alifariki dunia mchezaji wa kikapu wa kimataifa wa Marekani Dennis Johnson. 

Nyota huyo wa kikapu alifariki dunia kwa shambulio la moyo wakati wa mazoezi huko Texas katika dimba la Austin Convetion Center.  

Alifariki dunia akiwa na umri wa miaka 52. 

Pia katika medani ya kikapu nchini humo ilikuwa ikimfahamu kwa jina la DJ. 

Dennis alizimia mwishoni mwa mazoezi na kukimbizwa katika hospitali iliyokuwa karibu lakini hata hivyo alikata roho saa chache baadaye. 

Kifo cha nyota huyo wa kikapu katika Ligi Kuu nchini Marekani (NBA) kilishtua wapenzi na mashabiki wa mchezo huo. 

Mchezaji mwenzake wakati wakisoma chuo kikuu Danny Ainge alikaririwa akisema Dennis alikuwa mchezaji wa kiwango cha juu wa zama zote. 

Kwa upande wake hasimu wake Bill Laimbeer alimwita mchezaji mkubwa katika klabu kubwa. 

Wakati anafariki dunia alikuwa kocha wa klabu ya Austin Toros alikotua mwaka 2005 akitokea Florida Flame. 

Pia DJ aliwahi kuwa kocha wa Los Angeles Clippers mwaka 2003. Alianza kuhudumu akiwa Seattle SuperSonics (1976-1980), Phoenix Suns (1980-1983) na baadaye Boston Celtics (1983-1990). Baada ya kustaafu kikapu alisalia kuwa skauti wa vipaji wa klabu ya Celtics. 

Mnamo mwaka 1993 alikuwa kocha msaidizi wa Celtics nafasi aliyoikalia hadi mwaka 1997. 

Baada ya kukaa nje alirudi tena katika kikapu akiwa kocha msaidizi wa LA Clippers mnamo mwaka 2000 ambako alisalia kwa mika minne. 

Aliwahi kuwa kocha wa mpito katika LA Clippers mwishoni mwa msimu wa 2002-03 akisimamia miamba hiyo kwa michezo 24 baada ya kuondoka kwa kocha Alvin Gentry. 

Pia DJ aliwahi kuwa skauti wa vipaji katika klabu ya Portland Trail Blazers na mnamo mwaka 2004 alitajwa kuwa kocha mkuu wa klabu ya Florida Flame na baadaye Austin Toros. 

Enzi zake akiwa dimbani Dennis alifunga pointi 15, 535 akifanikiwa kuchukua ribaundi 4249 huku akitoa pasi za mwisho 5,499. 

Alikuwa akitumika katika nafasi ya Shooting Guard awapo dimbani alijulikana sana kama mkata umeme kwa lugha za kimichezo au wakati mwingine alifahamika kama mkata shombo katika mechi za mtoano katika historia ya NBA. 

Mnamo mwaka 1979 alitwaa tuzo ya MVP. Alipigiwa kura ya kikosi cha wachezaji watano maarufu Five All-Star pia All-NBA First and second teams, pia alichaguliwa mara tisa mfululizo katika kikosi cha ulinzi maarufu All-Defensive Teams. 

Dennis alizaliwa Septemba 18, 1954 huko San Pedro akiwa ni mtoto wa nane kati ya 16 kutoka kwa baba ambaye alikuwa mfanyakazi wa jamii na mfyatuaji wa matofali huko Compton, California katika viunga vya Los Angeles.