Twaweza yadai usajili wa laini za simu umeminya uhuru wa maoni

Shirika la lisilo la Kiserikali la Utafiti Twaweza limesema tangu serikali ianzishe zoezi la usajili wa laini za simu, uhuru wa maoni kwa njia ya simu kwa alama za vidole umepungua tofauti na hapo awali.

Akizungumza katika mahojiano maalumu na Idhaa ya Kiswahili ya DW, Mkurugenzi wa shirika hilo Aidan Eyakuze alisema uwazi katika utoaji wa maoni kwa njia ya simu umepungua baada ya serikali ya Jamhuri ya Muungano wa Tanzania kuanza zoezi la usajili wa laini kwa alama za vidole mnamo mwaka 2019.

Eyakuze alisema hapo awali walipokuwa wakifanya utafiti wa masuala mbalimbali yakiwamo ya kisiasa nchini miongoni mwa njia ambazo walikuwa wakitumia ni kuwapigia simu wananchi na kutaka maoni yao walikuwa wakifunguka bila hofu lakini hali imekuwa tofauti na ilivyo sasa ambapo wengi wamekuwa wakihofia usalama wao baada ya utoaji wa maoni yao kwa njia hiyo.

Mkurugenzi huyo alisema utafiti kwa njia hiyo umekuwa mgumu kwani wengi wamekuwa waoga wakihofia kukamatwa na vyombo vya usalama hasa ukizingatia sheria nyingi zilizopo nchini tangu mwaka 2015 zimekuwa kikwazo cha utoaji huo wa maoni akitaja Sheria ya Huduma za Vyombo vya Habari, Sheria ya Takwimu, Sheria ya Makosa Mtandaoni.

Alipoulizwa kuhusu hatima ya taasisi yake Eyakuze alisema bado wanaendelea kufanya kazi yao kama walivyojiwekea malengo yao tangu kuanzishwa kwake miaka 10 iliyopita na kwamba kwa sasa wamepanua wigo wa kufanya utafiti wao wakizifikia Kenya na Uganda.

Hata hivyo Eyakuze alisema Twaweza imekuwa ikikusanya maoni katika medani zote huku medani ya siasa ikifuatiliwa kwa karibu na wadau mbalimbali wakiwamo waandishi wa habari, lakini kutokana na hali ya kisiasa nchini medani hiyo imekuwa ngumu kuifanya kutokana na sheria zilizopo.

Aidha Eyakuze aliweka bayana kuhusu hatima ya pasi yake ya kusafiria (Passport) ambayo bado imeshikiliwa na mamlaka husika tangu mwaka 2018 hadi sasa kwamba bado anasubiri mamlaka hizo zitasema nini kuhusu yeye.

Idara ya Uhamiaji ilikaririwa mnamo mwaka 2018 kuwa ni utaratibu wa kawaida mtu anapotuhumiwa kuwa sio raia wa Tanzania, Idara hiyo huzuia 'passport' kwakuwa ni mali ya Rais kwa maana hiyo 'passport' ni mali ya serikali, na wakikamilisha uchunguzi basi taratibu nyingine hufuata.