Mchongaji wa Kifimbo cha Nyerere apendekeza Utamaduni uwe na Wizara yake

Omary Mwariko

Msanii wa kitaifa na kimataifa Omary Mwariko amependekeza Wizara ya Habari, Utamaduni, Sanaa na Michezo imefanyiwe marekebisho mapya ili kuongeza ufanisi katika utekelezaji wa majukumu yake.

Akizungumza na gazeti hili msanii huyo ambaye ndiye aliyechonga kifimbo cha Baba wa Taifa Mwalimu Julius Nyerere alisema miongoni mwa marekebisho yanayotakiwa kufanyika ni kuondoa utamaduni ambao ingefaa utengenezewe wizara yake.

“Lugha zetu, muziki wetu, ngoma zetu, historia, matambiko yetu, falsafa na dini zetu za asili zingepata kuangaliwa kwa kina, kinachofanyika sasa ni maneno tu ambayo hayawezi kututoa hapa tulipo ingefaa utamaduni utengenezewe wizara yake,” alisema Mwariko.

Mwariko alisema mpaka sana kipengele cha utamaduni hakijapewa nafasi ya kutosha katika wizara hiyo na ndio sababu kimekuwa kama mtoto yatima ndani ya Wizara hiyo.

“Viongozi wa kijadi kama wazee wa kaya, wazee wa ukoo na watemi pamoja na mila za jadi, desturi na siasa za asili katika mila za Kitanzania hazijapewa uwanja mkubwa katika wizara kinachoonekana ni masuala ya sanaa kwa kiasi kidogo na michezo kwa kiasi kikubwa,” aliongeza.

Aidha msanii huyo aliongeza utamaduni ukitengewa wizara yake katika uteuzi wa watendaji ni vema wakaangaliwa wale ambao wamekubuhu katika utamaduni badala ya kujali vyeo vya kisiasa ambavyo wakati mwingine vinakosa afya ya kutekeleza majukumu yake kutokana na waziri husika kukosa uelewa wa kutosha wa masuala hayo.

“Itasaidia sana kumpata waziri wa utamaduni ambaye anayajua vizuri masuala ya utamaduni kwa kina kwa kufanya hivyo atakuwa ameitendea haki wizara husika,” alisema.

Mwariko alisema wachoraji, wachongaji, waganga wa kienyeji, wachawi na walogaji hawajapewa nafasi ya kutosha wafanye yao na kuongeza kwamba ustaarabu wa Kimagharibi umeharibu kabisa ladha halisi ya mila na desturi za Kitanzania.

“Ukimwambia mtu mlogaji ni mtu muhimu atakwambia Mungu amekataza kumloga mtu, sasa kumbe ustaarabu wa Kimagharibi ulipofika ulishusha yetu ili kupandisha yao sasa mbinu iliyotumika ni kwa kutumia dini, lakini kuna ulazima wa kurudisha mila na desturi zetu la sivyo zitapotea hivi hivi,” alisema Mwariko.

Mwariko akizungumza jambo mbele ya mwandishi wa habari Jabir Johnson Mei 12, 2020 mjini Moshi.