Kuwaita Waandishi wa Habari wambea sio sahihi

Katika jamii yoyote mtu mwenye tabia ya umbea huchukiwa, hutengwa na hata wakati mwingine hupigwa kwa kuonekana kuwa ni chanzo cha migogoro na huku viongozi wa dini wakimwona mtu wa aina hiyo kuwa ni mtenda dhambi. 

Kuna waandishi wa vitabu mbalimbali wanatetea suala la umbea kama Mwanasaikolojia wa Russia na mwandishi wa kitabu kiitwacho ‘Nguvu ya Umbea’, Maria Konnikova anasema hakuna mtu anayeweza kuukwepa umbea na kushauri kuwa mtu asihangaike kutaka kuwazuia wambea kusema wayatakayo.

Ninafahamu kuwa katika maisha ya uandishi wa habari kuna mahali tunakosea kama zilivyo kada nyingine za udaktari, ualimu na kadhalika kwani hakuna hata mmoja ambaye amekamilika asilimia zote.

Nakubaliana na baadhi ya makosa yanayofanyika na waandishi wachache ambao nafikiri neno hili ‘umbea’ limekuwa likitumika kuwakilisha waandishi wa habari. Utasikia mitaani baadhi ya maneno”…huyo mwandishi wa habari anakuja…” wakimaanisha mmbea anakuja.

Tafsiri mbalimbali za neno umbea zinaonyesha kuwa ni mazungumzo ya ovyo ovyo yasiyo ya maana. Ninafahamu kuwa asili ya mwanadamu ni kuzungumza japokuwa wakati mwingine hujikuta akiishia kutoa mifano halisi ya maisha ya watu wengine na hivyo kuingia katika mgogoro wakati mtu aliyesemwa anaposikia.

Ningependa kila mtanzania afahamu kuwa kuwaita waandishi wa habari wambea sio jambo la heshima na la kiuungwana. Waandishi wa habari tumekuwa mbele kuuhabarisha umma kwa kadri tunavyoweza katika hali ngumu na furaha lakini hatimaye shukrani ya punda ni mateke mnatuita majina yasiyofaa.

Imefikia hatua mkikaa vijiweni mnasema kwa sasa uandishi wa habari hakuna, stori zao ni nyepesi zisizo na mashiko, hazigusi wananchi halafu wakati huohuo mkiona mmebanwa mnaanza kutuita waandishi wa habari wakati mwingine tunaambulia matusi kwa mmoja mmoja au kama tasnia kwamba hatujikiti kufuatilia kwa kina; hivi kweli moyo huo tunaupata wapi wakati mnatuita majina ya kukera kama sisi wambea? Sisi ni binadamu tunastahili heshima kama binadamu wengine, Kama ni umbea kaeni nao ninyi wenyewe.

Hii ni taaluma yenye misingi yake sasa kutuita wambea ni kutukosea heshima na si jambo la kiuungwana. Utu ambao huzaa ushirikiano na mshikamano ukikosekana baina yetu na ninyi wananchi itakuwa ni vurugu.

Kwani neno letu moja linaweza kuwasha msitu. Tumeshuhudia baadhi ya nchi kalamu na karatasi ya mwandishi wa habari ilipotumika vibaya ilileta maafa katika eneo husika amani ilivurugika kabisa. Hatupendi tufike huko tunataka Tanzania yenye utashi.  Ningewaomba watanzania ondoeni maneno ya kejeli katika fani hii ili tuijenge Tanzania yetu.