Umeme wa REA mwokozi wa mazingira Kilimanjaro

Kibo Enviroment Conservation Group wakiwa na miti muda mchache kabla ya kupanda miti hiyo katika Mtaa wa Shauri Moyo, Kata ya Majengo mjini Moshi ikiwa ni Kumbukumbu ya Mwaka mmoja baada ya kuondokewa na Mjasiriamali na Mwanamazingira Dkt. Reginald Mengi aliyefariki dunia Mei 2, 2019.

IMEELEZWA uwepo wa umeme wa Wakala wa Nishati Vijijini (REA) kwa wakazi wengi mkoani Kilimanjaro umeokoa ukataji wa miti kwa kiasi kikubwa ukilinganisha na kabla ya nishati hiyo kutua katika maeneo hayo.

Akizungumza katika zoezi la upandaji miti 250 katika mtaa wa wa Shauri Moyo katika kata ya Majengo, mjini Moshi Mkurugenzi wa taasisi isiyo ya Kiserikali ya Kibo Enviroment Conservation Group Daniel Mvungi alisema wakala wa umeme vijijini umekuwa sehemu ya kuzuia ukataji wa miti na matumizi makubwa ya kuni na mkaa kwa wakazi wengi wa vijijini hali ambayo imekuwa ikitoa ahueni kwa maeneo ya miji.

“Jadi ya mwafrika hususani mtanzania ni kutumia kuni na mkaa lakini nyakati zinabadilika kutokana na ongezeko la watu na mahitaji yao, sasa ujio wa REA umesaidia kupunguza matumizi hayo kwa sasa mwananchi anaweza kutumia vifaa baadhi vya umeme ambapo zamani isingewezekana,” alisema Mvungi.

Aidha Mvungi alisema Umeme wa REA umekuwa sehemu ya kuhamasisha matumizi ya nishati bora katika shughuli za uzalishaji, kilimo, viwanda vidogo vidogo na vya kati, na biashara ili kukuza uchumi vijijini.

“Umeme wa REA umewezesha upatikanaji na matumizi ya nishati bora kwa ajili ya huduma za kijamii vijijini kama vile afya, elimu, maji na mawasiliano,” alisema Mvungi.

Aidha Mvungi aliongeza kuwa uwepo wa nishati bora kama gesi umekuwa mbadala wa matumizi ya kuni na mkaa hali ambayo imesaidia hata mijini kusiwepo ongezeko kubwa la mkaa ukilinganisha na miaka ya nyuma hali ambayo imepunguza uchafu wa hewa katika maeneo ya mijini.

“Serikali imefanya jambo la msingi kusambaza gesi hadi maeneo ya vijijini jambo ambalo limesaidia kupunguza ukataji wa miti,na uchafuzi wa hewa,” alisema Mvungi.

Mwenyekiti wa Mtaa wa Shauri Moyo Omar Danga alisema kwa sasa elimu kuhusu mazingira inazidi kupenya katika vichwa vya wakazi wengi wa mijini na vijijini na kuongeza kwamba hiyo inatokana na juhudi zinazofanywa na wadau mbalimbali wa mazingira kuelimisha watu kuhusu faida za uwepo wa miti katika maisha ya kila siku.

Kwa upande wake Mwenyekiti wa Mtandao wa Vijana wa Utetezi na Uwajibikaji Ansila Malawiti alisema mpaka sasa katika kikundi chao chenye vijana wapatao 20 wamekuwa wakijishughulisha na upandaji wa miti na utoaji wa elimu ya mazingira katika mitaa mbalimbali mjini Moshi ambapo mita zaidi ya miti 6,000 imepandwa katika kipindi cha miezi 12 iliyopita.