Kwaheri Denis Golberg msalimie Nelson Mandela mwambie tunapambana na Corona na Wasaliti

Aprili 29, 2020 alifariki dunia Mwanaharakati wa Kupinga Ubaguzi wa Rangi nchini Afrika Kusini Denis Goldberg. Alifariki dunia akiwa na umri wa miaka 87 nyumbani kwake Hout Bay, Cape Town.

Goldberg alikuwa miongoni mwa watu wawili waliokuwa wamebaki baada ya harakati za kupinga ubaguzi wa rangi (Apartheid) nchini Afrika mnamo mwaka 1963-1964. Goldberg alikuwa na Nelson Mandela aliyefariki akiwa na umri wa miaka 95 mwaka 2013, Walter Sisulu (1912-2003) na Ahmed Kathrada (1929-2017) ambao nao walishafariki dunia.

Aliyebaki kwa sasa baada ya waliokuwepo wakati wa harakati hizo ni Andrew Mokete Mlangeni.

Goldberg alifariki dunia kwa kansa ya mapafu na kutangazwa na serikali ya Afrika Kusini huku Rais Cyril Ramaphosa akitoa salamu za rambirambi na kusema aliyatoa maisha yake kwa ajili ya watu.

Tuangazie maisha yake Golberg; Sheria zilizopasishwa na wazungu katika kipindi hicho ziliwatambua watu weupe kuwa ni raia wa daraja la juu ambao walipaswa kupewa haki na fursa zote za kijamii, kisaisa, kiuchumi, kielimu na kiutamaduni.

Suala hili lilijenga ukuta na mtengano katika jamii ya Afrika Kusini ambayo katika upande mmoja ilikuwa na wazungu na watu weupe, na upande wa pili kuliwepo wazalendo weusi. Kila kitu kilitofautiana baina ya pande hizo mbili.

Vyuo na shule za watu weupe zilitenganishwa na zile za watu weusi. Goldberg alikuwa mzungu mweupe ambaye aliyepinga utengano huo hatua iliyofanya atupwe jela la Pretoria Central.

Hata jela zilikuwapo za weupe na weusi ambapo alikotupwa Goldberg ilikuwa maalumu kwa washtakiwa wa kizungu. Jela la Robben Island ilikuwa kwa ajili ya weusi kama Nelson Mandela

Goldberg alianza kutafutwa mwanzoni mwa mwaka 1963 hatimaye Julai 11, 1963 polisi walivamia makazi ya wanaharakati wa African National Congress huko Rivonia kitongoji kilichokuwapo Kaskazini Mashariki mwa Johannesburg katika mkutano ambao wanaharakati hao walipanga kukutana huko.

Nyumba hiyo ya Liliesleaf ilikuwa inatumiwa na wanaharakati hao kwa siri takribani miaka miwili. Goldberg alikamatwa na wenzake katika shamba hilo Walter Sisulu, Govan Mbeki, Raymond Mhlaba na Rusty Bernstein.

Baada ya kufikishwa kwenye vyombo vya sheria ilibainika kuwa wakati kina Goldberg wakikamatwa Mandela alikuwa tayari yupo jela na walibaini kuwa alikuwa miongoni mwa waliokuwa wakifanya kazi kupitia vielelezo mbalimbali walivyovikuta huko Liliesleaf hivyo ikabidi wamwongeze kwenye kesi hiyo iliyopewa jina la Rivonia Trial.

Siku moja baada ya kukutwa na hatia Goldberg alikutana na wanasheria wake Bram Fischer, Joel Joffe, Arthur Chaskalson na George Bizos ambao walimwambia kwamba mashtaka ambayo alikuwa akikabiliwa nayo yalikuwa ni magumu ambayo asingeweza kukwepa adhabu ya kunyongwa hadi kufa.

Nelson Mandela na Denis Goldberg

Goldberg aliazimia moyoni mwake kumlinda Mandela na viongozi wengine hivyo akaamua kuchukua wajibu huo kujibu mashtaka ya utengenezaji wa silaha na kwamba mpango huo uliandikwa na yeye na hawezi kukataa. Ilipangwa Goldberg atoroshwe lakini ilishindikana.

Goldberg alikuwa miongoni mwa waanzilishi wa tawi la kijeshi la ‘uMkhoto we Sizwe’ ndani ya ANC.

Hata hivyo madai ya kuwapo jela haikuwa mara ya kwanza kwa Goldberg kwani mnamo mwaka 1957 alijiunga na chama cha Kikomunisti kilichokuwa kimefutwa mwaka 1950.

Mnamo Machi 30, 1960 alikamatwa na makaburu kwa kuunga mkono migomo katika miji kadhaa nchini humo baada ya Mauaji ya Sharpville yaliyotokea mnamo mwaka 21, 1960.

Akiwa na mama yake waliswekwa jela kwa miezi minne bila kupanda kizimbani. Hatua hiyo ilimfanya apoteze kazi yake ya uhandisi akiwa na Kampuni ya Athlone Power Station.

Wakati alipopandishwa kizimbani Juni 12, 1964 alikuwa na miaka 31 ambapo alikuwa ni umri mdogo kuliko wengine katika kesi hiyo na alikuwa pekee mtu mweupe (White Man). Wakati anahukumiwa mama yake alikuwapo siku hiyo, inaelezwa kuwa hakumsikia Jaji wakati akitoa hukumu kwa ajili ya Goldberg kwenda jela akamuuliza kwa sauti, “Denis, nini? Jaji amesema nini?” Goldberg alimjibu, “ Maisha, na maisha ni ya Kustajaabisha.”

Mnamo Machi 1950 akiwa na miaka 16 alianza masomo yake ya Uhandisi (Civil Engineering) katika Chuo Kikuu cha Cape Town.

Akiwa hapo ndipo alipokutana na mwanadada mwanaharakati wa Kikomunisti Esme Bodenstein na alimwoa mnamo Januari 1954. Walizaa mtoto anayeitwa Hillary (1955) na David (1957).

Hatimaye baada ya mapambano marefu mfumo usio wa kibinadamu wa Apartheid huko Afrika Kusini ulifikia kikomo mwaka 1991 na mnamo Mei 11, 1994 Mandela alikuwa Rais wa kwanza mweusi kuongoza taifa hilo.

Mfumo wa ubaguzi wa rangi wa Apartheid ni miongoni mwa sura za ukatilii na unyama wa kutisha na ubaguzi wa kizazi uliotawala Afrika Kusini kwa miaka mingi kwa maslahi ya wazungu walio wachache dhidi ya wazalendo weusi.

Kwa dunia yetu ya sasa vita imekuwa ikipiganwa ndani na nje ya nchi husika. Kila taifa kwa sasa linahaha kutafuta namna litakavyoponya uchumi wake kutokana na janga la Corona.

Rais wa Jamhuri ya Muungano wa Tanzania John Pombe Magufuli naye kwa staili yake anaokoa uchumi wa taifa lake kwa staili yake ambayo huenda haiwapendezi watu, hata hivyo nakubaliana naye kuwa mtazamo wa Kimagharibi umekuwa haupati nafasi kwake huenda aliwahi kumsoma Walter Rodney, namna Wazungu walivyoinyonya Afrika na kuifanya ishindwe kuendelea. Huenda ndiyo sababu ameenda kwa Andry Rajoelina kusaka suluhu baada ya mwenzake kugundua dawa ya kuzuia corona.

Pia JPM huenda alifuatilia kwa karibu kauli za msomi wa masuala ya jamii wa Uingereza Herbert Spencer ambaye aliwahi kusema mtu mwenye rangi nyeusi hana uwezo wa kufikiria katika daraja la juu zaidi ya kutumia hisia na muonekane.

Huenda watanzania hawaoni nia ya ndani ya JPM katika hilo kama ambavyo Wafaransa walishindwa kuiona nia ya ndani ya Gustave Eiffel aliyetengeneza Mnara wa Eiffel uliopo pale Champs de Mars jijini Paris na kwa miaka mingi imekuwa nembo ya Ufaransa. Vilevile Wajerumani waliposhindwa kuiona nia ya ndani ya Otto von Bismarck ya kuifanya Ujerumani izungumzike Ulaya yote.

Goldberg umeondoka lakini mwambie Mandela bado tunaendelea kupambana na wasaliti wanaosaliti mambo ambayo yanaweza kuifanya Afrika yetu ikawa katika mwonekano ambao utakuwa wa sisi wenyewe. Mlipambana kuondoa mfumo uliokuwa ukiwatenganisha watu wa rangi na mbari mahsusi, kuwalazimisha kuishi maeneo mahsusi na kuwanyima haki zao zote za kisiasa, kijamii na kibinadamu.

Lakini kwa sasa nafikiri kwa sehemu utakuwa uliona enzi za uhai wako namna viongozi wa siasa hapa Afrika wanavyoendelea kusaliti maono yenu ya kuiweka Afrika na watu wake katika usawa. Kumekuwa na wasakatonge tu kwa kizazi chetu wanaojificha kwa kivuli cha kusaidia wananchi hatimaye wanawasaliti.

Hawako tayari kuvumilia mateso ya maumivu kama ulivyofanya wewe Goldberg na wenzako. Ulikubali kuachishwa kazi ili uwatetee weusi waliokuwa wakibaguliwa licha ya kwamba ulikuwa mweupe. Hakika tunakushukuru kwa jitihada zako licha ya kwamba hufahamiki na katika ardhi yangu ya Tanzania.

Nina mengi ya kunena juu ya hili lakini niseme tu, “Kwaheri Denis Goldberg msalimie Nelson Mandela mwambie Tunapambana na Corona na Wasaliti.”

Ahmed Kathrada, Walter Sisulu, Nelson Mandela na Denis Goldsberg enzi za uhai wao.