Buriani Brian Dennehy (1938-2020)

Aprili 15, 2020 ilikuwa siku ya majonzi kwa wafuatiliaji wa filamu za kimataifa baada ya kuondokewa na mmojawapo wa wachezaji wa filamu wa nchini Marekani Brian Dennehy. Nyota huyo alifariki akiwa na umri wa miaka 81.

Dennehy ni mshindi wa tuzo ya Golden Globe, tuzo mbili za Tonny na tuzo moja ya Laurence Olivier huku akishiriki tuzo za Emmy takribani mara sita enzi za uhai wake.

UTAMKUMBUKA VIPI DENNEHY?

Wengi wa vijana wa karne ya 21 wanaweza wasimjue vizuri nyota huyo lakini wa karne ya 20 na wafuatiliaji wengine wanaweza kuona namna Dennehy alivyoonyesha umahiri wake katika filamu mbalimbali alizocheza.

Lakini ya kwanza kwa jamii ya Kiafrika naweza kusema ni ile ya First Blood ambayo alicheza na Sylvester Stallone ‘Rambo’, Richard Crenna ‘Kanali Sam Trautman’ iliyotoka mwaka 1982. Katika filamu hiyo ya First Blood hakika alionyesha kuimudu nafasi yake katika Jeshi la Polisi la Marekani. Dennehy alitumia jina la Will Teasle akiwa ni Afisa Jeshi la Polisi

Katika filamu ya First Blood inaanza ikiwa ni baada ya miaka saba baada ya kumaliza vita huko Kusini Mashariki wa Asia, veteran wa vita vya Vietnam John Rambo anaamua kwenda kumtembelea rafiki yake wa siku nyingi, akiwa na malengo ya kujifunza hapo ilikuwa baada ya rafiki yake kufariki dunia kwa kansa mwaka mmoja kabla ya safari hiyo, rafiki huyo alifariki kutokana na kemikali ya sumu iliyokuwa ikitumika wakati wa vita vya Vietnam miaka ile ya 1961 hadi 1971 maarufu kama Agent Orange.

Rambo anaonekana akiendelea na safari yake kuelekea katika mji mdogo wa Hope, Washington. Wakati anarudi baada ya safari isiyo na mafanikio anakutana na Afisa wa Polisi Will Teasle ambaye jina lake halisi ni Brian Dennehy.

Will Teasle anamzuia Rambo kuendelea na safari yake akimchukulia kuwa ni mtu asiyehitajika katika mji huo. Wakati akiwa na Teasle katika gari la Polisi anamuuliza kuhusu wapi anaweza kupata chakula. Teasle anamjibu kuwa chakula cha jioni kinapatikana kilometa 30 kutoka walipokuwa. Teasle anamtoa nje ya mji wa Portland ambako Rambo alikuwa ametokea.

Rambo anashushwa na Teasle kwenye gari na kutakiwa kutorudi tena mjini. Wakati anataka kumtoa kinguvu Rambo anakataa kuondoka lakini baadaye anakubali kushuka.

Teasle anaondoka gari lake na kuanza safari ya kurudi mjini, akiwa kwenye gari anamchungulia kwenye kioo cha pembeni cha gari lake na kumuona Rambo akirudi tena mjini hivyo anamkamata kwa kosa la uzururaji na kumfikisha katika kituo cha polisi.

Sasa kutokana na hali yake ya kimaisha alivyokuwa Vietnam Rambo alikuwa na nywele ndefu na kisu kikali cha kivita. Akiwa kituo cha Polisi anakamatwa na kunyang’anywa kisu chake kitendo hicho anakifanya Mkuu wa Kituo Msaidizi Art Galt.

Wasaidizi wa Teasle wanaanza kumtesa Rambo na kumfanyia dhihaka kama zote, hali ambayo inamkumbusha Rambo kama Mateka wa Kivita (PoW) alipokuwa Vietnam.

Walipojaribu kutaka kumnyoa nywele zake kwa kutumia wembe mkali ndipo anafanikiwa kuwadhibiti na kukichukua tena kisu chake na kuingia msituni.

Teasle anaratibu timu ya kumtafuta Rambo msituni. Akiwa msituni Galt anauawa na Rambo kitendo ambacho Teasle kinamuudhi. Rambo anambembeleza Teasle kuwa kifo cha Galt kilikuwa ni ajali tu wakashindwa kumwelewa na kuzidi kumtafuta kwa udi na uvumbi.

Hapo sasa ndio wanaona makali ya Rambo akiwamo Teasle mwenyewe kunusurika kuuawa kutokana na Rambo kuwa miongoni mwa wanajeshi wa zamani katika kikosi maalum cha Green Beret.

Rambo ‘anamkwida’ Teasle na kumwelezea kuwa anaweza kuwamaliza wote endapo watendelea kumfuatilia.

Hatimaye mwalimu wake Rambo, Kanali Trautman anaingilia suala hilo na kumtia mikononi mwa Polisi Rambo ambaye anahukumiwa jela na kazi ngumu.

Hivyo ndivyo unaweza kumwelezea Brian Dennehy katika filamu ya First Blood (1982). Alizaliwa Julai 9, 1938 huko Bridgeport, Connecticut.

Alifariki dunia Aprili 15, 2020 huko New Haven, Connecticut. Aliingia katika taaluma ya uigizaji wa Kimataifa akiwa na umri wa miaka 38.

Aliigiza filamu nyingi ikiwamo ya Death of Salesman (2000) akifahamika kwa jina la Willy Loman. Pia Gorky Park (1983), Silverado (1985), Cocoon (1985), F/X (1986), Presumed Innocent (1990), Romeo + Juliet (1996), na Knight of Cups (2015).

Buriani Brian Dennehy, asante kwa mchango wako katika ulimwengu na maisha aliyokupa Mwenyezi Mungu hapa duniani.