Kamati ya Siasa Mkoa wa Kilimanjaro yatembelea miradi.

Wajumbe wa Kamati ya Siasa ya mkoa na ile ya Wilaya, wakiwa wanakunywa maji ya mtiririko kwenye mradi wa maji Njoro.

Kamati ya Siasa ya Chama Cha Mapinduzi mkoa wa Kilimanjaro, imesema kuwa Serikali ya Awamu ya Tano, imefanikiwa kuboresha maisha ya wananchi wake, kupitia miradi mbalimbali.

Hayo yamesemwa Jana na Katibu wa CCM mkoa wa Kilimanjaro Jonathan Mabihya, wakati wa ziara ya kukagua na kutembelea mradi wa ujenzi wa maji ya mtiririko Njoro, Wilaya ya Rombo mkoani humo.

Alisema dhamira ya viongozi waliopo madarakani chini ya Rais Dkt. Magufuli ni kuhakikisha wanatekeleza kwa ukamilifu Ilani ya CCM ya Mwaka 2015/2020.

"Serikali iliyopo chini ya uongozi wa Mwenyekiti wa Chama Cha Mapinduzi (CCM), Rais Dkt. Magufuli, imefanya kazi kubwa kwenye utelekezaji wa Ilani ya CCM, hivi sasa inaendelea kujenga miundombinu ya barabara, reli, maji na vituo vya afya,"alisema Mabihya.

Aidha Kamati hiyo ya Siasa ya mkoa na ile ya Wilaya ya Rombo, pia walitembelea ujenzi wa vyumba viwili vya madarasa katika shule ya sekondari Nduweni na ujenzi wa bweni la wasichana katika shule ya sekondari Motamburu.

Mabihya alifafanua kuwa "Lengo la ziara hii ni  kukagua utelekezaji wa Ilani ya CCM katika kipindi cha miaka mitano tangu wananchi walipoipa  CCM ridhaa ya kuongoza nchi mwaka 2015 na kumchagua Rais Dkt. Magufuli  ili aweze kuongoza nchi kwa kipindi cha miaka mitano,".

Aliongeza kuwa "Unapopewa uongozi, lazima ujitathmini , hivyo Kamati ya Siasa ya mkoa na ile ya Wilaya tupo hapa kwa ajili ya kutathmini  yale tuliyoyaahidi kwa wananchi katika kipindi cha miaka mitano," alisema Mabihya.

Alisema kwenye mafanikio hapakosi changamoto, hivyo katika ziara hii, Kamati ya Siasa  ya mkoa imeona ni vyema kuipitia  miradi iliyokwisha kutekelezwa na endapo kuna changamoto zilizojitokeza iweze kuzifanyia kazi.

Akisoma taarifa ya mradi wa maji Njoro II Meneja mradi wa Kampuni ya Kiliwater Prosper Kessy, alisema mradi huo hadi kukamilika kwake utagharimu kiasi cha Sh bilioni 1.7

"Mradi huu hadi kukamilika utanufaisha wananchi 24,684, na hivyo kupunguza changamoto ya maji kwa asilimia 13," alisema.

Naye Mkuu wa shule ya sekondari Nduweni Raphael Kital, alisema shule ina idadi ya wanafunzi 568 ambapo wavulana ni 269 na wasichana ni 299.

"Shule ina vyumba vya madarasa tisa, kwa sasa shule ina kabiliwa na upungufu wa madarasa matano, kutokana na changamoto hiyo uongozi wa Serikali ya kijiji na kata umefanya jitihada za dhati za kupunguza changamoto hiyo kwa kununua eneo jipya kwa ajili ya mradi wa ujenzi wa vyumba vya madarasa viwili,"alisema.

Awali Mkurugenzi mtendaji wa halmashauri ya Wilaya ya Rombo Godwin Chacha, alisema halmashauri hiyo  itachangia mabati ili kuweza kuwaunga mkono wananchi waliojitolea nguvu kazi zao za kujenda madarasa hayo.

Kwa upande wake Mwenyekiti wa CCM Wilaya ya Rombo Anthony Tesha, alichangia mifuko ya saruji 10  katika kuwaunga mkono huku CCM mkoa nao wakichangia mifuko ya saruji 30.

Katibu wa CCM mkoa wa Kilimanjaro Jonathan Mabihya, akiongoza Kamati ya Siasa kukagua na kutembelea mradi wa ujenzi wa maji Njoro II uliopo Wilaya ya Rombo.

STORY & PHOTO BY: Kija Elias, Moshi...........................................Februari 4, 2020