Wafungwa wa Kiberiberi waachiwa huru Algeria

Mahakama moja mjini Algiers nchini Algeria imewaachia huru wafungwa watano wa kisiasa waliokuwa wameshikiliwa katika jela ya El Harrach kutokana na kukutwa wakiwa wamevaa nembo ya Amazigh iliyopigwa marufuku nchini humo. 

Wafungwa hao Boudjemil Mohand, Idir Ali, Karoun Hamza, Lekhel Kamel na Okbi Akli walishikiliwa tangu Juni 23 mwaka huu. Mahakama hiyo ya Bab El Oued iliwakuta hawana hatia na kuwaachia huru. 

Nje ya mahakama hiyo hadhira ya watu zikiwamo familia za wafungwa hao, wanachama wa makundi ya utetezi, vyama vya wanaharakati, waandishi wa habari walionekana mapema asubuhi ya Novemba 14 kusubiri uamuzi wa mahakama hiyo iliyopo magharibi mwa mji mkuu Algiers. 

Baada ya kuingia mahakama hapo Hakimu wa mahakama hiyo alitaka utulivu wakati akisoma shitaka hilo. Baada ya kumaliza na kutangaza uamuzi wa kuwaachia wafungwa hao vilio na kelele za furaha zilidhihirika kwa hadhira hiyo huku wengi wao wakiwa na simu za viganjani kuchukua tukio hilo. 

Umati wa watu walisikika wakitoa sauti mbele ya Polisi, “ Algeria, Huru na Demokratiki, Sisi ni Imazighen, Hakuna wa Kutuzuia”. Mbunge aliyejitambulisha kwa jina la Fetta Sadat alikaririwa na vyombo vya habari kuwa jaji wa mahakama hiyo amesimamia sheria.

“Nina furaha kuona hakika imetendeka lakini ninasikitika kuona kwa takribani miezi mitano wafungwa hawa wameshikiliwa jela bila sheria yoyote kuhusika,”  alisema Sadat.

Bendera ya Amazigh ikoje?

Nembo hiyo ni ya kiharakati kwa jamii ya watu wa Beriberi ambayo huwa inatumika na watu mbalimbali wengi wao wakiwa waandamanaji, wanaharakati wa kisiasa na kitamaduni.

Bendera hiyo ilizinduliwa katika kitongoji cha Wadya, mjini Kabylia kwenye jimbo la Tizi Wezzu nchini Algeria na mwanajeshi wa zamani wa Algeria Youcef Medkour. 

Miaka ya 1970 Chuo kimoja cha Waberiberi kianzisha bendera hiyo. Mnamo mwaka 1998 kongamano la dunia la Amazigh liliidhinisha bendera hiyo maeneo ya Tafira huko Las Palmas de Gran Canaria katika visiwa vya Canary. 

Mnamo Juni 2019 Jenerali Ahmed Gaid Salah alisema bendera hiyo haiwezi kuvumilika katika maandamano nchini humo Algeria. 

Bendera hiyo ina rangi za Panamazigh ikiwa na mistari mitatu ya ulalo yenye urefu na upana sawa ikiwa na rangi ya bluu, kijani na njano; aidha katikati ya bendera hiyo na rangi nyekundu katika herufi Yaz ambayo ni alfabethi ya 30 katika lugha ya Kiberiberi. 

Kwa sasa bendera hiyo imechukuliwa na wanaharakati katika nchi 10 za barani Afrika Morocco, Algeria, Tunisia, Libya, Mauritania, Mali, Niger, Burkina Faso, Misri na  Visiwa vya Canary.  

CHANZO: EL WATAN