Lyatonga Mrema: Sitegemei huruma za CCM

Agustino Lyatonga Mrema

Mwenyekiti wa Chama Cha Tanzania Labour Party (TLP) Dkt. Agustino Lyatonga Mrema, amesema hafurahishwi na mwenendo wa vyama vya upinzani  kujiondoa katika mchakato wa uchaguzi wa serikali za mitaa unaoendelea nchini na kwamba hata sita kuzungumzia namna ambavyo vyama hivyo vinavyofanya siasa za chuki na kutowajali wananchi waliowachagua.

Mapema hivi karibuni vyama  hivyo vya upinzani  vikiongozwa na Chama cha Demokrasia na Maendeleo Chadema, vilitangaza kutoshiriki uchaguzi wa serikali za mitaa, unaotarajiwa kufanyika Novemba 24 mwaka kwa madai kuwa kufanya hivyo ni kuendeleza uonevu unaofanywa katika mchakato wa uchaguzi huo.

Dkt.  Mrema alitoa kauli hiyo jana, wakati akimnadi  mgombea wa TLP anaewania nafasi ya uenyekiti wa kijiji cha Kiraracha Andrea Lekule, ambapo alisema kususia uchaguzi wa serikali za mitaa ni kunawanyima fursa wananchi haki ya kuwasilishiwa mawazo yao juu ya maendeleo ya nchi.

''Kiongozi yeyote wa kisiasa ambaye amekomaa kisiasa, hapaswi kugomea uchaguzi, anachotakiwa ni kupambana hadi dakika ya mwisho,  viongozi wenzagu wa vyama vya upinzani waliosusia  ka uchaguzi wa serikali za mitaa, viongozi hao hawafai kuwepo kwenye nafasi hizo kwani wanawasababishia wananchi kutokupata kiongozi sahihi atayewaletea maendeleo,”alisema Dkt. Mrema.  

Aidha Dkt. Lyatonga Mrema alisema  Chama Cha TLP,  kimejipanga kushinda kwenye uchaguzi wa serikali za mitaa unaotarajia kufanyika Novema 24 mwaka, kutokana na chama hicho kuwa na sera nzuri za kuwaambia wananchi ili waweze kukichagua.

“Mimi sitegemei huruma za Chama Cha Mapinduzi (CCM), kama ambavyo watu wamekuwa wakisema kuwa CCM waniachie hicho kijiji, sitegemei na haiwezekani tutashindana kwenye sanduku la kura,”alisema Dkt. Mrema.

Alifafanua kuwa Chama Cha TLP kitaendelea na mapambano ya kumwaga sera zake kwenye mikutano ya kumnadi mgombea wa uenyekiti  na kwamba fainali  yake itahitimishwa kwenye sanduku la kura Novemba 24.

Dkt. Mrema alisema  anaamini chama chake kitaibuka ushindi na kuchukua  kijiji cha Kiraracha, kutokana na kuwa na sera ambazo vyama vingine havina,  baada ya chama hicho kubaini  kwamba vyama vingine kutokuwa na sera za kumjali mwananchi  hali ambayo imewasababaisha hata wengine kujiondoa kwenye uchaguzi huo.

“TLP kimekuja kushindana kwa nguvu zote  kwa kushirikiana na wanachama wa TLP, washabiki wa chama changu hivyo kusema kuwa mimi nategemea huruma za CCM huko ni kujidanganya na  kuhakikishi CCM nitaigaragaza mapema kabisa,”alisema.

Akiwa katika kampeni za kumnadi mgombea uenyekiti wa kijiji cha Kiraracha  kupitia tiketi ya CCM, Thomas Mrema, Mwenyekiti wa CCM mkoa wa Kilimanjaro Patrick Boisafi, alisema  ili kuendelea kumpa heshima yake Dkt. Mrema aliwataka wananchi wa kijiji hicho kuendelea kuipigia kura CCM kwani hiyo ndiyo heshima pekee ambayo CCM inaweza kumpa Mrema.

“Chama Cha Mapinduzi CCM kitaendelea kumshukuru Dkt. Mrema  kwa kazi kubwa ambayo amekuwa akisaidia  katika kuendelea kutuunga mkono licha ya kwamba hatukuwa na mapatano na CCM,”alisema Boisafi.

Mwenyekiti wa CCM mkoa wa Kilimanjaro, Patrick Boisafi.

STORY BY & PHOTO BY: Kija Elias, Moshi

DATE: Novemba 21, 2019