Maazimio 6 ya NCCR-Mageuzi kuhusu Uchaguzi wa Serikali za Mitaa Novemba 24, 2019

Mwenyekiti wa Chama cha NCCR- Mageuzi Taifa na Mbunge wa Vunjo mkoani Kilimanjaro James Mbatia  amekutana na wagombea uchaguzi wa Vijiji na Vitongoji na kupitisha maazimio baada ya kujitoa katika kinyang’anyiro cha uchaguzi wa serikali za mitaa wa Novemba 24, 2019. 

Maazimio hayo yamefikiwa Novemba 23, 2019 katika mkutano na waliokuwa wagombea wa chama hicho katika ngazi ya vijiji na vitongoji katika Jimbo la Vunjo. Mkutano huo ulifanyika katika Ukumbi wa Mikutano wa Kwa Njovu, Himo.

1.    Kwa kuwa TAMISEMI wana mgongano wa maslahi katika kusimamia uchaguzi huu, chama cha NCCR-Mageuzi kinashauri kuwe na Tume Huru ya Uchaguzi ambayo haitashirikisha watendaji wa kat wala vijiji, wakurugenzi na vyombo vingine vya dola. Uchaguzi usimamiwe na Tume Huru ya Uchaguzi.

2.   Kamati za Maendeleo za kila kijiji ziundwe na viongozi wetu ambao walinyimwa fursa ya kugombea na Chama cha Mapinduzi, ili maendeleo ya wananchi yaendelee mbele. Na hii ni kwasababu wanaosemekana kuwa ni viongozi waliopiya bila kupingwa baadhi yao ni wahalifu, walevi wa kupindukia, wengine ni wagonjwa wa akili na wasio na maadili wala hawana uwezo wa kuiunganisha jamii.

3.    Kwa kuwa Chama cha Mapinduzi na serikali yake imetubagua na kutunyima haki ya kidemokrasi ya kuchagua viongozi wetu  Chama cha NCCR-Mageuzi kinatoa siku 30 za kupata majawabu ya mchakato mzima. Na serikali serikali haitatoa majawabu Chama chetu hakitatoa ushirikiano kwa viongozi walioteuliwa na CCM katika Jimbo la Vunjo.

4.   Kwa kuwa mchakato mzima wa uandikishwaji wa wapiga kura hadi uchukuaji wa fomu ulikiuka kanuni na mwongozo wa uchaguzina kutumia pesa za wananchi kuendesha mchakato huo  ambao umegubikwa na ulaghai wa matumizi ya pesa na kusababisha hisia za utakatishaji wa fedha hivyo Chama cha NCCR-Mageuzi ngazi husika kione jinsi ya kuwasiliana na Wanasheria, Taasisi za haki za bibnadamu na Taasisi mbalimbali za Kimataifa kuingilia kati suala hili la ukiukwaji wa Haki za Msingi za Binadamu.

5.   Kwa kuwa viongozi wa serikali za mitaa, vijiji na vitongoji wanafanya kazi kwa kujitolea na kushirikiana na jamii husika katika kuleta maendeleo ya eneo husika hivyo basi upatikanaji wa viongozi utokane na jamii husika bila kudhamiwa na vyama vya siasa na kutojihusisha juu ya mchakato mzima wa kupata viongozi hawa.

6.   Chama cha NCCR-Mageuzi kinashauri kuharakisha upatikanaji wa Katiba Mpya itakayowaongoza watanzania na serikali ya Tanzania.