Kila mwanafunzi wa darasa la kwanza Moshi kuotesha mti wake 2020

Wadau wa Mazingira Manispaa ya Moshi, mkoani Kilimanjaro wametoa mapendekezo yao kwa Wizara ya Elimu, Sayansi na Teknolojia nchini, kuhakikisha kwamba wanafunzi watakaoandishwa kuanza darasa la kwanza mwaka 2020, na wale waliochaguliwa kujiunga na kidato cha kwanza 2020 kila mwanafunzi  aotesha mti wake mmoja  ili kuweza kuboresha hali ya mazingira katika nchi kwa ujumla.

Aidha wadau hao wametoa mapendekezo yao kwa Bunge la Jamhuri ya Muungano wa Tanzania kupeleka muswada wa marekebisho kwa wizara ya Elimu,  ambayo itamtaka  kila mwanafunzi atakayejiunga na elimu yake ya msingi na ile ya sekondari kupanda mti wake mmoja inayotolewa na wadau wa mazingira na kuutunza hadi hapo atakapomaliza elimu yake ya msingi au ya sekondari.

Hayo yamo kwenye risala iliyosomwa jana na Sophia John, wakati wa zoezi la uoteshaji miti ya asili  katika maeneo ya taasisi za umma, binafsi na kwenye makazi ya watu, zoezi ambalo lilifanyika jana katika kata ya Majengo mjini Moshi na kuratibiwa na asasi isiyo kuwa ya kiserikali inayojishughulisha na  utunzaji wa mazingi ya ‘Kibo Environment Conservation Group’ ya Manispaa ya Moshi.

“Tunaiomba serikali  kupitia Wizara ya Elimu Sayansi na Teknolojia, kutoa tamko  ambalo  litawaka walimu wakuu wa shule za msingi na sekondari, kuhakikisha kwamba kila wanafunzi atakaye andishwa kuanza darasa la kwanza na wale waliochaguliwa kujiunga na kidato cha kwanza 2020 kila mwanafunzi  aotesha mti wake mmoja ili kuweza kuboresha hali ya mazingira katika nchi yetu, alisema.

Pia wamewaomba walimu wa shule za msingi na sekondari  kuanzisha  mashindano ya upandaji wa miti kwa kila shule za msingi na sekondari ili kila  mtoto anayeingia shuleni hapo anaotesha mti wake mmoja kulingana na idadi ya watoto watakao andikishwa kuingia  darasa la kwanza au sekondari, jambo ambalo  litasaidia katika kabiliana na mabadiliko ya tabia nchi.

Akizindua zoezi hilo la miti ikiwa ni siku ya kumuenzi aliyekuwa mkuu wa mkoa wa Kilimanjaro Mhe;  Leonidas Gama, Afisa Mazingira Manispaa ya Moshi Emanuel John alisema kuwa halmashauri ya Manispaa hiyo imeanzisha kampeni ya kukamata mifugo yote inayozurura mitaani na kuharibu miti inayopandwa  ili kulinda na kutunza mazingira.

“Wapo baadhi ya wananchi wamekuwa wakiiachia mifugo yao na kuzurura ovyo, mifugo hiyo imekuwa ikiharibu miti inayopandwa, serikali imekwisha kutoa maagizo kwa watendaji kata wote kuhakikisha mifugo itakayoonekana kuzurura inakamatwa na wahusika wanachukuliwa hatua kali za kisheria,”alisema John.

Alifafanua kuwa serikali imekuwa ikifanya jitihada kubwa za kupanda miti  katika maeneo mbalimbali  na kwa Manispaa ya Moshi zoezi hili lilianzishwa na aliyekuwa mkuu wa Mkoa  Mhe; Leonidas Gama tangu mwaka 2012,”alisema.

Kwa upande wake Mkurugenzi wa Kibo Environment Conservation Group Daniel Mvungi, alisema kutokana na uharibifu kubwa wa mazingira ikiwemo ukataji miti kwa ajili ya kujipatia nishati ya kuni na mkuu,  asasi hiyo imeanzisha siku maalumu ambayo itakuwa ikifanyika Novemba 22 ya kila mwaka kupanda miti, ili  kumuenzi Mhe; Leonidas Gama, ambaye alisimama katika kuhakikisha mkoa wa Kilimanjaro unaendelea kuwa  mkoa wa kijani.

“Suala la upandaji miti limepewa kipaumbele na serikali kuanzia ngazi ya kitaifa hadi ngazi ya chini,  na kwetu sisi  Kibo Environment Conservation Group, katika siku ya leo tumepanda miti zaidi ya 1,000, kwenye shule ya msingi Majengo, taasisi binafsi na kwenye makazi ya watu, ikiwa ni siku ya kumuenzi aliyekuwa mkuu wa mkoa Mhe; Leonidas Gama ambaye alikuwa mwanaharakjati katika suala zima la mazingira,’alisema Mvungi.

Naye Kamishna wa Skauti Tanzania  Manispaa ya Moshi Mbena Emerensiana, alisema upandaji wa miti ni njia moja wapo ya utunzaji wa mazingira na kulinda uoto wa asili hivyo Skauti Tanzania itaendelea kuwa mstari wa mbele katika kushiriki kupanda miti ambayo itasaidia kukabiliana na mabadiliko ya tabia nchi.

STORY & PHOTO BY: Kija Elias, Moshi

DATE: Novemba 23, 2019