MAKTABA YA JAIZMELA: Joe Biden ni nani?

Novemba 20, 1942 alizaliwa mwanasiasa wa Marekani ambaye alihudumu kama makamu wa rais wa 47 wa taifa hilo kutoka mwaka 2009 hadi 2017.

Huyo ni Joe Biden. Jina lake halisi ni Joseph Robinette Biden Jr. Biden aliwahi kuliwakilisha jimbo la Delaware katika nafasi ya Useneta kutoka mwaka 1973 hadi 2009 kwa tiketi ya chama cha Demokratiki. 

Biden ameshatangazwa na chama chake kuwa katika uchaguzi mkuu wa 2020 nchini humo atakuwa mgombea wa urais kupambana na Donald Trump wa Republican. 

Biden hakupata mafanikio alipowania kuteuliwa kugombea nafasi hiyo mwaka 1988 na 2008. Biden alizaliwa katika Hospitali ya St. Mary’s huko Scranton, Pennsylvania kutoka kwa wazazi Catherine Eugenia Biden na Joseph Robinette Biden Sr. 

Alikuwa mtoto wa kwanza kati ya wanne kutoka katika familia hiyo ya kikatoliki akiwa na dada na kaka zake wawili. 

Mama yake ni kutoka katika uzao wa Ireland. Baba yake alikuwa ni mtu mwenye uwezo kabla ya kuzaliwa kwa Biden. Wakati wa ujio wake Biden duniani alijikuta katika wakati mgumu kiuchumi  huko Scranton. 

Mwanzoni mwa miaka 1950 baba yake aliamua kuondoka huko na kwenda Claymont, Delaware ambako aliishi kwa miaka kadhaa kabla ya kuhamia maeneo Wilmington, Delaware. 

Baba yake alikuwa muuzaji wa magari yaliyotumika na Joe Biden Sr alifanikiwa sana katika biashara hiyo na kuifanya familia yake kuwa na maisha ya kati. 

Alipokuwa mwanafunzi Agosti 27, 1966 alimwoa Neilia Hunter ambaye alimzalia watoto watatu, mkewe huyo alifariki dunia mwaka 1972 akiishi naye kwa miaka mitano tu. 

Mnamo mwaka 1977 alimwoa Jill Jacobs aliye naye mpaka sasa na  Biden alikuja kuwa mwanasheria mwaka 1969 na alichaguliwa na Baraza la Kaunti ya NewCastle mnamo mwaka 1970 kuwa mwanasheria. 

Alichaguliwa kwa mara ya kwanza kuwa seneta wa Marekani mnamo mwaka 1972 na kuweka rekodi ya kuwa seneta wa sita kushika nafasi hiyo katika umri mdogo kwenye historia ya taiafa hilo. 

Biden amechaguliwa mara sita kuongoza Delaware hadi alipokuja kuachia nafasi hiyo ili aweze kuwania umakamu wa Rais 2009. Biden anashika nafasi ya nne ya maseneta wakongwe nchini Marekani. 

Biden alikuwa mpinzani mkuu wa vita ya Ghuba ya mwaka 1991 lakini ndiye aliyeishauri Marekani na NATO kuingilia kati vita ya Bosnia mwaka 1994 na 1995.  

Pia alipiga kura ya kuidhinisha vita dhidi ya Iraki mnamo mwaka 2002 lakini alipinga kuongeza zaidi wanajeshi wa Marekani katika miji ya Baghdad na Al Anbar mwaka 2007 wakati wa utawala wa George W. Bush. 

Mnamo mwaka 2008 Biden alikuwa mgombea mwenza wa Barack Obama aliyekuwa akiwania urais wa taifa hilo. 

Baada ya uchaguzi huo Biden aliweka rekodi ya kuwa makamu wa rais wa kwanza mkatoliki kushika nafasi hiyo katika historia ya Marekani. 

Akiwa katika nafasi hiyo alishuhudia mabadiliko makubwa katika miundombinu ya taifa hilo huku akichangia pakubwa sera za nje za Marekani ambapo walifanikiwa kuyaondoa majeshi ya Marekani nchini Iraki mnamo mwaka 2011. 

Uwezo wake wa kukaa chini na wapinzani wao Republicans ulisaidia sana utawala wa Obama kupitisha baadhi ya sheria zenye manufaa kwa taifa hilo. Yeye na Obama walichaguliwa tena mwaka 2012 kuongoza taifa hilo. Oktoba 2015 Biden alitangaza kwamba hatawania nafasi ya Urais katika uchaguzi mkuu wa mwaka 2016. 

Januari 2017 Obama alimtunuku Biden medali ya Uhuru inayotolewa na Rais wa Marekani kwa yeyote alionyesha upekee. Baada ya kumaliza kipindi cha pili cha kuwania nafasi hiyo Biden alienda zake katika Chuo Kikuu cha Pennsylvania kuungana na wakufunzi wengine katika mojawapo ya kitivo chuoni hapo. 

Aprili 25, 2019 alitangaza kwamba atawania Urais katika uchaguzi mkuu wa mwaka 2020.