MAKTABA YA JAIZMELA: Papa Yohane XXIII ni nani?

Novemba 25, 1881 alizaliwa Papa Yohane wa 23 (Pope John XXIII). Alishika madaraka hayo ya juu katika Kanisa la Katoliki kuanzia Oktoba 28, 1958 hadi kufariki kwake Juni 3, 1963. 

Jina lake halisi ni Angelo Giuseppe Roncalli. Papa Yohane wa 23 alishika madaraka hayo kuliongoza kanisa hilo lenye makao yake makuu jijini Vatican.  Angelo Giuseppe alikuwa ni mojawapo wa watoto 13 wa familia moja ya kilimo iliyokuwa ikiishi kijijini huko Lombardy nchini Italia. Aliiingia katika huduma kwenye kanisa hilo Agosti 10, 1904. Akiwa katika kanisa hilo ametumikia katika nafasi mbalimbali katika maeneo tofauti ikiwamo Bulgari, Ugiriki na Uturuki. Januari 12, 1953  Papa Pius wa XII alimtawaza Roncalli kuwa Kardinali wa Santa Prisca huko huko nchini Italia. Roncalli hakutarajiwa kuchaguliwa kuwa papa. Aliingia katika nafasi hiyo akiwa umri wa miaka 76 kwa kura 11. Baada ya kuchaguliwa kwake alionyesha usawa miongoni mwa binadamu aliposema, “ Sisi sote tumeumbwa kwa mfano wa sura ya Mungu na hivyo basi sote tunafanana na Mungu.” Papa Yohane XXIII alijitahidi kushirikiana na makanisa mengine. Pia alipambana kuhakikisha kuwa maaskofu wa kanisa hilo nchini Italia hawajiingizi katika siasa. Aliondoa utaratibu wa enzi wa kuwa na makadinali 75 na kuwateua kufikia 85. Alitumia nafasi hiyo kuwatawaza makadinali kutoka Afrika, Japan na Ufilipino. Alitangazwa kuwa Mtumishi wa Mungu na Papa Paulo VI aliyechukua mikoba ya kuliongoza kanisa hilo baada ya kifo chake Novemba 18, 1965. Kwa mchango wake katika kanisa katoliki Julai 5, 2013 Papa Francis anayeliongoza kanisa hilo kwa sasa alimtangaza Papa Yohane XXIII kuwa Mtakatifu. Kwa sasa Papa Yohane XXIII anafahamika kama Papa Mzuri kwa kiitaliano “il Papa buono.”