Wanawake 2 wafungiwa miaka 8 wakisubiri kufunuliwa wanaume wa kuwaoa

Kuna msemo wa kiswahili unaosema ukistaajabu ya Musa utayaona ya Firauni. Kina dada wawili nchini Swaziland wamefungiwa katika chumba kimoja kwa muda wa miaka nane sasa wakisubiri wanaume wa kuwaoa kutoka kwa Bwana. 

Gazeti la Times of Swaziland limesema kina dada hao walifungiwa tangu mwaka 2012 wakiwa na umri wa takribani miaka 20. 

Hleziphi ambaye sasa ana umri wa miaka 34 na Ncobie Mphaphu mwenye umri wa miaka 32 wanaishi katika chumba hicho katika eneo la Kashewula, Mnyamatsini. 

Kwa mujibu wa taarifa kutoka nchini humo zinasema wanawake hao wawili bado ni mabikira wakisubiri ufunuo kutoka kwa Bwana kuhusu kupata waume wa kuwaoa. Wanawake hao ni waamini wa kanisa la Shembe Nazareth. 

Gazeti la Times of Swaziland limeandika kuwa kanisa hilo limechanganya tamaduni za Kizulu na Ukristo ndani yake ambazo zimejikita katika Agano la Kale katika Biblia.   

Mwanamke mmoja anayewatunza wanawake hao wawili ambaye anakadiriwa kuwa na umri wa miaka 50 amekaririwa akisema hawaruhusiwa kutoka na kuonana na wanaume wanatakiwa kukaa humo wakiendelea kuomba hadi Mungu atakapowafunulia.

CHANZO: TIMES OF SWAZILAND