Serikali yaondoa vikwazo usafirishaji sampuli za madini

Waziri Mkuu Kassim Majaliwa

Serikali ya Jamhuri ya Muuungano wa Tanzania imeondoa vikwazo vilivyokuwepo katika usafirishaji wa sampuli za madini kutoka eneo moja kwenda eneo jingine.

Hayo yalijiri wakati wa ufunguzi wa Maonyesho ya Pili ya Teknolojia na Uwekezaji katika Sekta ya Madini kwa mwaka 2019 yatakayodumu kwa siku saba hadi Septemba 29 mwaka huu katika viwanja vya CCM Kalangalala mkoani Geita.

Katika maonyesho hayo Waziri Mkuu Kassim Majaliwa alitangaza kuondoa vikwazo hivyo katika usafirishaji wa sampuli hizo za madini ambapo hapo awali ulikuwa ukikabiliwa na vikwazo mbalimbali.

Hapo awali ilikuwa ni lazima kwa mujibu wa sheria kusafirisha sampuli hizo kwa ruhusa ya Kamishna wa Madini au Katibu Mkuu wa Wizara ya Madini

Hata hivyo Waziri Mkuu aliwataka wamiliki wa leseni za usafirishaji na uyeyushaji wa madini kuzingatia sheria, kanuni, taratibu na miongozo ili kunufaisha pande zote mbili, kulipa kodi stahili na kuhakikisha leseni zao zinafanya kazi kwa muda uliopangwa.

Kwa upande wake Mkurugenzi  mtendaji wa Maabara ya Kupima Sampuli za Madini nchini (SML), Mhandisi Simon Shinshi alisisitiza kuwa wachimbaji wa madini wa wadogo  wa kati na wakubwa kuwa na taarifa sahihi za kimaabara pale wanapotaka kuchimba ili kuwaongoza kwenye teknolojia na gharama.

Mhandisi Shinshi aliongeza kuwa kwa kufanya hivyo itaondoa hasara kwani madini yatakuwa na thamani stahili hivyo yatapandisha kwa kasi uchumi wa Tanzania.

“Wachimbaji wadogo watumie maabara za ndani ambazo zinatoa majibu ya haraka na uhakika,” alisema Mhandisi Shinshi.

Kwa mujibu wa taarifa iliyotolewa na Maabara ya Madini nchini kwa mwaka 2018/19 wastani wa sampuli 50,000 ziliwafikia ikilinganisha na mwaka 2017/18 ambapo sampuli 40,000 zilifika katika maabara hali inayoonyesha kabla na baada ya vikwazo kuondolewa.

Aidha Mhandisi Shinshi alifafanua kwamba hadi sasa wanayo matawi manane ya maabara kwenye maeneo ambayo yanajihusisha na uchimbaji wa  madini hayo, huku akiyataja matawi hayo kuwa ni Mwanza, Geita, Katoro, Kahama, Tarime, Singida, Chunya na Makongolosi.

Kifungu cha 18(2) cha Sheria ya Madini ya Mwaka 2010 kinakataza mtu yeyote zaidi ya mmiliki halali wa leseni ya madini, kumiliki, kusafirisha au kuuza madini bila kuwa na kibali cha kufanya hivyo kwa mujibu wa Sheria. 

Kifungu cha 18(3) kinakataza mtu yeyote kusafirisha nje ya nchi madini au sampuli za madini bila kuwa na leseni ya madini, kibali cha kusafirisha madini nje ya nchi na uthibitisho wa malipo ya mrabaha. 

Kauli mbiu ya Maonyesho ya Pili mwaka 2019 ni “Madini ni Chachu ya ukuaji wa Uchumi wa Viwanda, tuwekeze kwenye teknolojia bora ya uzalishaji na tuyatumie masoko ya Madini.”

Imetayarishwa na Kija Elias…………………….Septemba 29, 2019