Mabasi yagongana uso kwa uso, 10 wafa Zimbabwe

Watu 10 wamepoteza maisha papo hapo  na wengine kujeruhiwa katika ajali ya basi iliyotokea katika barabara ya Harare-Bulawayo nchini Zimbabwe. 

Ajali hiyo imetokea katika eneo moja lililopo Kwekwe na Gweru nchini humo ikihusisha mabasi mawili yaliyogongana uso kwa uso. 

Waziri wa Nchi katika eneo la Midlands anayehusika na Mambo ya Ndani ya Majimbo Cde Larry Mavima amethibitisha kutokea kwa ajali hiyo. 

Mavima amesema ajali hiyo imetokea majira ya saa 10:30 alfajiri wakati basi la kampuni ya Mandeep Tours ikitokea Afrika Kusini kwenda Gokwe ilipogongana uso kwa uso na Kampuni ya mabasi ya Govasberg iliyokuwa ikienda Gweru.

Aidha waziri huyo amesema wakati wakikaribia kibao cha kilometa 232 dereva wa Mandeep alipoteza mwelekeo wa basi lake baada ya taa zilizokuwa kali za basi la Govasberg hatua iliyosababisha mabasi hayo kugongana. 

Taarifa kutoka nchini humo zinasema hadi sasa maofisa wa polisi wanaendelea na uchunguzi wa tukio hilo lililotokea jana alfajiri. 

Mavima amesema miili ya marehemu imepelekwa katika hospitali ya Kwekwe.

Hata hivyo Waziri wa Serikali za Mitaa, Kazi za Jamii na Nyumba Cde July Moyo amesema ajali hiyo ni maafa ya kitaifa na kwamba familia zilizokutwa na zahama hilo zitapewa usaidizi kutoka serikali. 

Aidha ametoa wito kwa madereva kuthamini maisha ya watu pindi wanapoendesha vyombo vya moto na kuzingatia sheria za usalama barabarani kwani ajali iliyotokea ilikuwa na uwezekano wa kuthibitiwa kabla ya maafa hayajatokea. 

Msemaji wa Polisi wa Zimbabwe Kamishna Msaidizi Paulo Nyathi amethibitisha kutokea kwa ajali na kwamba watayataja majina ya wahanga wa tukio hilo baada ya uchunguzi kufanyika. 

Mwanamke aliyenusurika katika ajali hiyo Mollen Ngara ambaye alikuwa katika Basi la Govasburg ameviambia vyombo vya habari kuwa uchovu wa dereva la Mandeep ndio uliomfanya aingie kwenue upande waliokuwapo na kugongana uso kwa uso.