Wachimbaji madini Geita wafukiwa na kifusi, wapoteza maisha

Wachimbaji wadogo wawili wamepoteza maisha baada ya kufukiwa na kifusi katika eneo la machimbo yanayomilikiwa na Kampuni ya Bitakwate Investiment katika Kijiji cha Buziba Kata ya Lwamgasa Wilaya ya Geita.

Wachimbaji hao waliingia katika machimbo hayo ambayo yalikua hayatumiki tena wakiwa na lengo la utafutaji wa dhahabu na ndipo walipokutwa na mauti.

Wachimbaji hao wamekutwa na mauti usiku wa kuamkia oktoba 27 wamefahamika kuwa ni Jumanne Mgaya na Jovin Baraka.

Vifo hivi vimetokea zikiwa zimepita siku 27 tangu wachimbaji wengine wafukiwe katika Mgodi wa Imalanguzu huku mpaka leo hii juhudi za kuwaokoa zikiendelea.

Ndugu Erasto Ndiyanabo ni Mkurugenzi wa kampuni ya Bitakwate inayomiliki migodi huo amesema eneo hilo lilikuwa limefungwa kutokana kutozalisha.

Mmoja ya wachimbaji Mathius Pius amedai wachaji wanaamua kuingia maeneo hatarishi kutokana na ugumu wa maisha walau wajipatie riziki.

Mkuu Mkoa wa Geita Mhandisi Robert Gabriel ameagiza baadhi ya taasisi za serikali kufanya kazi kwa pamoja kukagua na kuangalia athari zinazoweza kujitokeza hapo baadae katika maeneo ambayo yamesitishwa shughuli za uchimbaji.