Waandishi wa Habari Kilimanjaro watakiwa kujiunga na Vicoba

 

Waandishi wa Habari mkoani Kilimanjaro Kija Elias, Rodrick Mushi, Venance Maleli, Profesa Bee, Enos Masanja

Waandishi wa habari Mkoani Kilimanjaro, wamehamasishwa kujiunga na vikundi vya Vicoba ili waweze kujikwamua kimaisha na kuboresha maisha ya familia zao.

Wito huo umetolewa na Mwenyekiti wa Moshi Tanzanite Vicoba Group Maleli Venance, wakati wa hafla fupi ya kukabidhi kijiti hicho mara baada ya kumaliza muda wake wa uongozi.

Venance alisema  kuwepo kwa Vicoba ya waandishi wa habari iliyoanzishwa mwaka 2013 umesaidia kuinua maisha ya wanahabari ambao wameweza kujiunga pamoja na kuanzisha mfuko kwa jamii kwa ajili ya kuweka na kukopa.

“Moshi Tanzanite Vicoba ni umoja unaoundwa na baadhi ya wanahabari wa Mkoa wa Kilimanjaro, pamoja na akina mama lishe, uwepo wa kikoba hiki umekuwa na manufaa makubwa sana kwetu sisi, hivyo tuwahamasishe na wanahabari wengine ambao hawajaweza kujiunga kukitumia kikundi chetu kwa kuja kujiunga nasi,”alisema Venance.

Aidha amewataka wanahabari hao kutumia fursa hiyo ili kuongeza mitaji yao na kwamba kwa kufanya hivyo watakuwa na uelewa zaidi katika masuala ya mnyororo wa thamani kwenye mazao, masoko ya kimataifa, fursa na kuimarisha biashara.

Alisema kuanzishwa kwa Moshi Tanzanite Vicoba kumesaidia kwa kiasi kikubwa kwa wanahabari kuwa na nidhamu ya fedha tofauti na hapo awali ambapo mwandishi anapotoka kwenye majukumu yake ya kazi alikuwa akiitumia fedha bila kuzalisha.

“Shughuli yoyote ya Maendeleo inahitaji mitaji hasa mitaji ya fedha, kuanzishwa kwa Vicoba vya wanahabari kumesaidia kwa kiasi kikubwa kujiletea maendeleo na kujikwamua kiuchumi,”alisema.

Kwa upande wake Mwenyekiti mpya wa kikundi hicho Fadhila Omary , aliwashukuru wanachama hao kwa kumchagua kuwa mwenyekiti, ambapo aliwaomba wanakikundi hao kumpa ushirikiano katika muda wote wa uongozi wake.

“Kuwepo  kwa mfumo wa kuweka na kukopa kwa wananchama waliojiunga kwa pamoja na kuunda kikundi kwa malengo ya kujikwamua na umasikini (Vicoba), utawasaidia wanahabari walioko ndani ya kikundi hicho kukopa  kwa riba nafuu na pia itawawezesha wanahabari hao kukutana na kubadilishana mawazo,”alisema Fadhila.

Katika uchaguzi huo Mwenyekiti alichaguliwa Fadhilla Omary, Katibu Kija Elias, Mweka Hazina Charles Ndagulla, Mtunza nidhamu Upendo Mosha.

Wengine waliochaguliwa katika Moshi Tanzanite Vicoba yenye wanachama 30 ni Queen Isack, Hellen Traiphone, Jackline Massawe, Deborah Nkya na Winifrida Nyella.

Wakizungumza baadhi ya wanachama walionufaika na Vicoba kupitia kikundi hicho cha Moshi Tanzanite Vicoba Queen Isack na Upendo Mosha, walisema wameamua kuanzisha mradi wa ufugaji wa kuku  ambao kwa sasa zinawaingizia kipato na kuendesha shughuli za maisha yao.

Imeandikwa na Kija Elias, Moshi…………..Oktoba 14, 2019