MAKTABA YA JAIZMELA: Imran Khan ni nani?

Oktoba 5, 1952 alizaliwa Waziri Mkuu wa sasa wa Pakistan Imran Khan. Jina lake halisi ni Imran Ahmed Khan Niazi. 

Ameweka rekodi ya kuwa Waziri Mkuu wa 22 wa taifa hilo lililopo barani Asia. Kabla ya kuingia katika masuala ya siasa Khan alikuwa mchezaji wa kimataifa wa Kriketi. Miongoni mwa mafanikio makubwa katika mchezo huo ni pale alipoiongoza timu ya taifa kutwaa Kombe la Dunia la Kriketi mnamo mwaka 1992. Ushindi huo ulikuwa wa kwanza na wa pekee katika taifa la Pakistan. Fainali ya kriketi ilichezwa jijini Melbourne, Australia ambapo Pakistan chini ya unahodha wake Imran Khan iliwazabua England kwa mikimbio 22. Hiyo ilikuwa Machi 25, 1992 mbele ya watazamaji 87,182. Khan alistaafu baada ya kutwaa taji hilo la dunia akiwa na rekodi ya mikimbio 3,807 na wiketi 362 katika mashindano mbalimbali aliyocheza. Aidha Khan anasalia kuwa miongoni mwa nyota wa nane waliofanya vizuri katika All Rounders ikiwa na maana rekodi katika kuviringisha mipira na kupiga. Na mwaka 2010 alikuwa miongoni ya watu maarufu walioingizwa katika Kumbukumbu za Wakongwe wa Kriketi za Shirikisho la Kriketi Duniani (Hall of Fame). Imran Khan alizaliwa mjini Lahore, na kupata elimu yake katika chuo cha Aitchson kilichopo Lahore. Pia akaendelea katika Shule ya Royal Grammar Worcester nchini England. Khan hakuishia hapo alisoma katika chuo cha Kebler kikiwa ni tawi la Chuo Kikuu cha Oxford nchini England.. Alianza kucheza kriketi akiwa na umri wa miaka 13 na kwa mara ya kwanza akiwa na umri wa miaka 18 aliitwa katika timu ya taifa ya Pakistan. Mchezo wake wa kwanza ulikuwa mwaka 1971 katika Test Series dhidi ya England. Baada ya kuhitimu masomo yake huko Oxford rasmi alianza kuitumikia Pakistan mwaka 1976 hadi alipostaafu mwaka 1992. Alipata kitambaa cha unahodha mwaka 1982 hadi alipostaafu. Mnamo Aprili 1996 Khan alianzisha chama cha siasa ambacho kwa sasa ndiye mwenyekiti cha Tehreek-e-Insaf kikiwa ni chama cha mrengo wa kati. Miongoni mwa mafanikio makubwa ya chama hicho ni kuunda serikali ya muungano katika jimbo la Kaskazini Magharibi la Khyber Pakhtunkhwa. Katika uchaguzi mkuu wa mwaka 2018 Tehreek-e-Insaf kilifanikiwa kutwaa ushindi wa kishindo katika viti bungeni dhidi ya chama tawala PML; hatua ambayo ilimweka madarakani Imran Khan katika serikali ya shirikisho. Khan anasalia kuwa mtu maarufu katika ardhi ya Pakistan. Pia Imran Khan ameandika kitabu cha ‘Pakistan: A Personal History’.