Eswatini ni taifa la namna gani?

Ufalme wa Eswatini ni jina ambalo limeanza kutumika mwaka 2018, hapo awali ilikuwa ikifahamika kwa jina la Swaziland. 

Ni taifa dogo sana Kusini mwa Afrika ambalo limejifunga. Kutoka upande wa mashariki hadi magharibi ni umbali wa kilometa 130 na Kaskazini hadi kusini ni umbali wa zaidi ya kilometa 200. 

Eswatini ni nchi ndogo kuliko zote Kusini mwa Afrika, ikiwa imeundwa na milima na baridi na maeneo baadhi yenye joto na ukame. Lugha asili ya taifa hilo ni siSwati. 

Ufalme huu ulianza rasmi kutambuliwa baada ya uwepo wa uongozi imara wa Ngwane III. Eswatini inapakana na Afrika Kusini na Msumbiji.

Majina yanayotumika sasa kwa kiasi kikubwa yametokana na uongozi wa Mswati II aliyeongoza mapambano makali hadi mipaka ikachorwa miaka 1881. 

Baada ya Vita ya Pili ya Makaburu iliyoanza 1899 na kumalizika mwaka 1902, Eswatini ilipewa jina la Swaziland ikiwa mikononi mwa Waingereza. Septemba 6, 1968 ilijipatia uhuru wake. 

Katiba inayotumika sasa ya taifa hilo ni ya mwaka 2005. Mfumo wa utawala ni wa kijadi unaoongozwa na Ngwenyama ambaye ni Mfalme Mswati III na Ndlovukati ambaye ni Malkia Ntfombi Tfwala tangu mwaka 1986.  

Uchumi wa taifa hilo ni mdogo mno ikiwa ni miongoni mwa mataifa yanayoendelea. Kwa makadirio ya sensa ya watu na makazi ya mwaka 2016 inaonyesha taifa hilo lina takkribani watu milioni 1.3    

Eswatini ina changamoto kubwa ya maradhi ya HIV/AIDS na kifua kikuu. Inakadiriwa asilimia 26 ya watu wameathiriwa na virusi vya ukimwi. Umri wa kuishi wa watu wa taifa hilo ni miaka 58. 

Idadi kubwa ya watu katika Eswatini ni vijana walio na wastani wa umri wa miaka 20.5 ambao wanachangia asilimia 37.5 ya watu katika taifa hilo. 

Imetayarishwa na Jabir Johnson…….Oktoba 21, 2019