Wanafunzi watakaobainika kuchoma moto majengo yashule kukiona

Mkuu wa Wilaya ya Siha Onesmo Buswelu, amewaonya wanafunzi watakaothubutu kuchoma majengo, kuharibu miundombinu au kuiba mali za shule Serikali haitasita kuwachukulia hatua kali za kisheria.

Buswelu alitoa kauli hiyo jana wakati wa hafla fupi ya kukabidhiwa mradi wa vyumba vitatu vya madarasa yaliyojengwa katika shele ya Sekondari Sikirari iliyopo kata ya Donyomurwaki na Serikali kupitia Wizara ya Elimu kupitia mradi wake wa lipa kadiri ya matokeo makubwa sasa EP4R.

Alisema wapo baadhi ya wanafunzi hususan wa shule za Sekondari, wamekuwa na mipango ya kuchoma majengo ambayo yamejengwa kwa fedha nyingi, ambapo pia aliwataka kujiepusha kuweka visasi na walimu wao kwani kwa kufanya hivyo kunasababisha madhara ikiwemo kurudisha nyuma maendeleo ya shule.

DC Buswelu alisema zipo baadhi ya shule nchini zimekuwa zikichomwa moto na baadhi ya wanafunzi ambapo kwa upande mwingine inatokana na visasi visivyokuwa na tija kwa maendeleo ya kielimu hivyo kuwataka wazazi na walezi kuwakanya  watoto wao kutojihusisha na vurugu hizo.

“Serikali ya Awamu ya Tano imefanya mambo makubwa sana katika wilaya ya Siha, imeweza  kutusaidia ujenzi wa madarasa, mabweni katika sekta ya elimu kwenye shule za msingi na sekondari, lengo likiwa ni kuzipatia ufumbuzi kero za walimu na wanafunzi,”alisema DC Buswelu.

Akizungumza wakati wa makabidhiano hayo afisa Elimu sekondari wilaya ya Siha  Mwl Herman Msasa alisema amefurahi kuona ujenzi wa madarasa hayo ukimalizika kwa wakati na kuwataka wanafunzi kusoma kwa bidii ili kuweza kufanikisha malengo yao ya kielimu.

"Kwanza napenda nichukue fursa hii kuipongeza kamati ya ujenzi kwa kusimamia mradi huu mpaka kukamilika kwake hizi ni jitihada kubwa sana kwanza kwa kumaliza ujenzi huu ndani ya muda tuliokubaliana" alisema Mwl Msasa.

Aidha Mwl Msasa aliwasihi wanafunzi kujitahidi kutunza mali za serikali yakiwemo madarasa, madawati na samani nyingine ili ziweze kudumu kwa muda mrefu.

Kwa upande wake Mkuu wa shule ya Sekondari ya Sikirari Mwl Kauka Akyoo, alisema shule  hiyo ilipokea kiasi cha Sh milioni 60  kutoka Wizara ya Elimu kupitia mradi wake wa lipa kadiri ya matokeo makubwa sasa (EP4R) kwa ajili ya ujenzi wa vyumba vitatu vya madarasa.

“Tunaishukuru sana Serikali ya Jamhuri ya Muungano ya Tanzania chini ya uongozi wa Rais Dkt. Magufuli kwa kutoa elimu bila malipo pamoja na kutoa fedha za mradi huu,”alisema Mwl Akyoo.

Aidha alisema shule hiyo pia inakabiliwa na changamoto ya chumba kimoja cha darasa, ofisi ya walimu,  jengo la utawala, jiko, bwalo la kulia chakula wanafunzi, bweni la wasichana pamoja na ukamilishwaji wa maabara.

Imeandikwa na Kija Elias…..Oktoba 21, 2019