Mtetezi wa ndoa za utotoni Bwananyambi afariki dunia

Chifu wa Kijadi wa Wilaya ya Magonchi nchini Malawi maarufu kwa jina la Bwananyami amefariki dunia mapema leo asubuhi katika hospitali ya Queen Elizabeth mjini Blantyre alikokuwa amelazwa. 

Chifu huyo wa Chowe ambaye jina lake halisi ni Atinga Sande alikuwa maarufu nchini Malawi kwa harakati zake za kupigania elimu kwa wasichana.

Bwananyambi alikuwa chifu wa vijiji 33 katika Chowe wilayani Mangochi.

Msemaji wa Serikali za Mitaa na Maendeleo Vijijini Muhlabase Mughogho amethibitisha kutokea kwa kifo cha chifu huyo aliyekuwa na ushawishi mkubwa. 

Kwa mujibu wa mdogo wa marehemu na mwenyekiti wa vijiji Balakasi amesema Bwananyambi alipelekwa katika Hospitali ya Wilaya ya Mangochi wiki lililopita na aliruhusiwa siku tatu zilizopita kabla ya hali yake kubadilika na kukimbizwa katika Hospitali ya Queen Elizabeth siku ya Ijumaa. 

Balakasi amesema dada yake alikuwa akilalamika kuhusu shinikizo la damu. Taarifa ya Familia hiyo imesema Bwananyambi atazikwa kesho katika makao makuu ya Wilaya ya Mangochi ya Ndumundu. 

Mkuu wa wilaya ya Mangochi Mchungaji Moses Chimphepo amemuelezea Bwananyambi, kuwa alikuwa mpambanaji asiyechoka katika kuwapigania wasichana ili waweze kwenda shule. 

Hivyo kuondoka kwake ni pengo kubwa katika wilaya na taifa la Malawi kwa ujumla. Aidha Mkuu wa wilaya huyo amesema ni miongoni kati ya machifu waliokuwa mbele katika kuzuia ndoa za utoto kwa wasichana ili waende shule kupata elimu. 

Bwananyambi alipambana kutunga sheria ndogo ndogo kwa ajili ya kuwaadhibu wazazi waliokuwa wakiwaozesha kwa wanaume ambao walikuwa wakiwapeleka nchini Afrika Kusini. 

Bwananyambi alichukua kiti cha Uchifu  Juni 12, 1998. Miezi 12 iliyopita Bwananyambi alinusuru ndoa 30  za watoto walio chini ya umri wa miaka 18. 

Asilimia 42 ya wasichana nchini Malawi huolewa kabla ya kufikisha umri wa miaka 18. Mmoja kati ya kumi huolewa kabla ya kufikisha miaka 15 ambayo ni sawa na asilimia 9. 

Kwa mujibu wa Shirika la Kimataifa linaloshughulika na Watoto la UNICEF linasema Malawi ni nchi ya 12 ulimwenguni kwa ndoa za utotoni. 

UNICEF inasema wanawake wanaishi katika ukanda wa kati huolewa wakiwa na umri mkubwa ukilinganisha na walioko katika mikoa ya Kaskazini na Kusini mwa taifa hilo. 

Takwimu za mwaka 2017 zinaonyesha endapo taifa hilo litafanikiwa kuzuia ndoa za utotoni litajipatia kiasi cha dola milioni 167 kwa mwaka. 

Malawi imejifunga kuwa ifikapo 2030 itakuwa imefanikiwa kukabiliana na changamoto hiyo ikiwa ni uwiano wa 5.3 ya Malengo ya Milenia (SDG’s).