Zala, Shibalov washinda hatua ya kwanza Dakar Rally 2020

Katika siku ya kwanza ya Dakar Rally 2020 katika jangwa la Saudia hapo jana Januari 5 kumeshuhudiwa dereva wa magari ya kampuni ya Mini Vaidotas Zala aliustaajabisha ulimwengu baada ya kumaliza nafasi ya kwanza katika hatua ya kwanza ambayo ilianza Jeddah hadi Al Wajh.

Ushindi huo umempiku bingwa mtetezi wa mbio hizo  katika magari Nasser Al-Attiyah ambaye hapo jana aliongoza lakini pancha tatu alizopata katika safari hizo zilitoa mwanya kwa Zala mwenye umri wa miaka 32 raia wa Lithuania.

Zala alitumia saa 3:19:04 huku nafasi ya pili ikishikwa na dereva mwingine wa mini Stephane Peterhansel (54) wa Ufaransa kwa saa 3:21:18.

Nafasi ya tatu ilishikwa na dereva kutoka Hispania Carlos Sainz akitumia saa 3:21:54 huku Al-Attiyah alishika nafasi ya nne akitumia saa 3:24:37.

Kwa upande wa malori kulishuhudiwa dereva wa kampuni ya malori ya Kamaz ya Russia  Anton Shibalov akimpita dereva mwenzake Andrey Karginov ambaye alishika nafasi ya saba. 

Bingwa mtetezi wa mbio hizo katika kategori hiyo Eduard Nikolaev alishika nafasi ya 10 akipoteza dakika 11 kutoka kwa mshindi wa hatua hiyo  Shibalov.

Nafasi ya pili ilishikwa na dereva wa kampuni ya Maz ya Belarus Siarhei Viazovich na Janus van Kasteren wa kampuni ya De Rooy Iveco alishika nafasi ya tatu.