MAKTABA YA JAIZMELA: James 'Jimmy' Griffin ni nani?

Januari 11, 2005 alifariki dunia mwanamuziki, mpiga gitaa na mtunzi wa nyimbo  wa Marekani ambaye alifahamika sana katika kategori ya soft rock akiwa na bendi ya Bread katikati ya miaka ile ya 1970. Huyu sio mwingine ni Jimmy Griffin. 

Jina lake halisi ni James Arthur Griffin. Jimmy alishinda tuzo ya Academy katika kategori ya Wimbo Bora wa Asili mnamo mwaka 1970. Katika wimbo wa ‘For All We Know’ alikuwa miongoni mwa walioandika. 

Alifariki dunia kutokana na maradhi ya saratani akiwa nyumbani kwake mjini Franklin huko Tennessee ikiwa ni miezi kadhaa ya kupatiwa matibabu. Alifariki dunia akiwa na umri wa miaka 61. 

Hadi anafariki alikuwa akiishi na mke wake aliyefahamika kwa jina la Marti, binti zake Katy na Alexis, watoto wake wa kiume Jamey na Jacob pia wajukuu Laura, Lilli, Gryffn na Max.

Jimmy alizaliwa Cincinati jimboni Ohio na alikulia huko Memphis, Tennessee. Mazoezi yake ya muziki yalianza baada ya wazazi wake kumuingiza katika masomo ya muziki hususani accordion. Alisoma katika shule ya Kingsbury mjini Memphis. 

Wakati akikua katika muziki Johnny Burnnette na Dorsey walikuwa kioo chake na hakika walimvutia sana Jimmy. Pia mara kadhaa alikwenda kuwatembelea, hatimaye alifanikiwa kuingia mkataba wa kurekodi na Reprise Records.

Albamu yake ya kwanza ilikuwa Summer Holiday aliyoitoa mnamo mwaka 1963. Pia alifanikiwa kuigiza katika filamu mbili miaka miwili baadaye baada ya kutoa albamu hiyo. Filamu ya For those who Think Young (1964) na None but the Brave (1965). 

Katikati ya miaka ya 1960 Jimmy aliungana na waimbaji wenzake akiwamo Michael Z. Gordon ambaye alikuwa mahiri sana katika utunzi wa nyimbo.  Wengine ni Ed Ames, Gary Lewis, Bobby Vee, Brian Hyland, The Standells, Lesley Gore, Sandy Nelson na Cher. 

Wote hao walishinda tuzo ya BMI  kupitia wimbo wao wa Apologize. Baadaye Jimmy alikutana na Robby Royer kupitia kwa mkewe Maria Yolanda. Kukutana huko kulimpeleka katika hatua nyingine ya mafanikio katika muziki. 

Mnamo mwaka 1968 Jimmy na Royer wakiwa na David Gates walitengeneza timu ya waimbaji na kuanzisha bendi mahiri ya BREAD huku wakimtumia mpiga drum Jim Gordon kutoa albamu yao ya kwanza. 

Baadaye Mike Botts alichukua nafasi ya Gordon kama mpigaji wa moja kwa moja katika bendi hiyo. Gordon alianza kuonekana katika albamu ya pili ya On the Waters.

Jimmy alizaliwa Agosti 10, 1943