Happy Birthday El Hadji Diouf (1981)

Januari 15, 1981 alizaliwa mshambuliaji wa zamani soka wa Kimataifa wa Senegal na klabu ya Liverpool na Bolton El Hadji Diouf.

Nyota huyo wa kandanda alizaliwa jijini Dakar. Katika maisha ya soka alikuwa akifahamika kama ni mchezaji kipaji mtata.

Amezitumikia klabu nyingi barani Ulaya katika mataifa ya Ufaransa, England na Uskochi.

Alianza maisha yake ya soka katika klabu ya Sochaux ya nchini Ufaransa mnamo mwaka 1998 na msimu uliofuata alitua katika klabu ya Rennes ambako alidumu kwa msimu mmoja.

Mnamo mwaka 2000 alisaini kuhudumu na Lens hadi mwaka 2002. Akiwa na Lens alifunga mabao 18 katika mechi 54.

Hata hivyo alionyesha uwezo mkubwa akiwa na timu ya taifa ya Senegal katika Kombe la Dunia mnamo mwaka 2002 alipokuwa miongoni mwa walioifikisha robo fainali ya mashindano hayo.

Kocha Gerard Houllier wakati huo akinoa Liverpool alivutiwa sana na muundo wa uchezaji wa Diouf hivyo akaidaka saini yake kwa pauni milioni 10.

Diouf alikuwa mshambuliaji ambaye kocha Houllier aliamini kwamba atamsaidia kubeba taji la Ligi Kuu kutoka mikononi mwa Manchester United.

Hata hivyo aliishia kushika nafasi ya pili. Katika siku za mwanzo Diouf alikuwa akisifiwa sana na mashabiki wa Liverpool kwani katika mchezo wake wa kwanza pale Anfield alifunga mabao mawili katika ushindi wa mabao 3-0 dhidi ya Southampton hiyo ilikuwa Agosti 24, 2002.

Alianza msimu wa 2003 katika Fainali ya Football League ambapo Liverpool iliizabua Manchester United kwa mabao 2-0.

Katika mchezo huo wa fainali Diouf hakufumania nyavu hivyo mashabiki wa Liverpool walisubiri mpaka Machi 2003 kwenye mchezo dhidi ya Bolton ambao Diouf alifunga kwenye ushindi wa mabao 2-0.

Kwenye mchezo huo Diouf alifunga na kutoa pasi ya mwisho. Katika mchezo mwingine ndani ya mwezi huo huo ilikuwa ni dhidi ya Celtic katika dimba la Parkhead kwenye Ligi ya Europa zamani ikijulikana kama UEFA Cup ambapo Liverpool ilitoka sare ya 1-1.

Katika mchezo huo sifa za Diouf kuwa ni mchezaji mwenye utata zilidhihirika kunako dakika ya 87 alipomvaa shabiki wa Celtic na kuzua tafrani uwanjani hapo na Polisi kumchukua Diouf kwa mahojiano zaidi.

Houllier alimpa makavu kuwa kitendo alichokifanya kitadidimiza maisha yake yote katika kandanda. Diouf alifungiwa mechi mbili na kukatwa mshahara wa majuma mawili kwa ajili ya kumpoza shabiki wa Celtic.

Msimu wa 2002-03 Diouf hakufunga tena bao katika klabu ya Liverpool  huku msimu wa 2003-04 akionyeshwa kadi za njano 12 na moja nyekundu.

Kadi hiyo nyekundu alionyeshwa Januari 7, 2004 alipomchezea vibaya Adrian Muttu katika mchezo ambao Liverpool iliibuka na ushindi wa bao 1-0 hivyo hakuwa tena mchezaji wa kuogopwa kutokana na kushindwa kufunga mabao. 

Jamie Carragher aliwahi kusema usajili wa Diouf huenda ndio ulikuwa mbaya katika historia ya Liverpool kwani alimaliza msimu pasipo kufunga bao. Msimu wa 2004-05 walimtoa kwa mkopo katika klabu ya Bolton  ambapo alianza kufunga tena akifunga mabao 21.

Baada ya misimu minne ya kuishi Bolton alitua Sunderland ambako alikaa msimu mmoja 2008-09 na baadaye Blackburn Rovers mnamo mwaka 2009 hadi 2011.

Nusu msimu wa 2010-11 Diouf alitolewa kwa mkopo katika klabu ya Rangers. Akitokea Uskochi alirudi Doncaster Rovers na mnamo mwaka 2012 alitua Leeds.

Kwa mara ya mwisho Diouf alihudumu na klabu ya Sabah FA ya Malaysia kabla ya kustaafu mnamo mwaka 2015.