Unaikumbuka 'Les Classique' 1978

Mustapha Dahleb mnamo mwaka 1978 akiwa na PSG

Januari 8, 1978 klabu ya Paris Saint Germain (PSG) ya nchini Ufaransa ilibadili mawimbi katika kandanda la nchi hiyo ikiwa ni miaka minane tu baada ya kuanzishwa kwake pale ilipoweka rekodi sawa na kuwa na miamba ya siku nyingi Olympique Marseille.

Hapo ndipo kilipozalishwa kile kinachotwa Le Classique au Derby de France ikiwa ni mechi ya mahasimu wa Ufaransa. 

Kwa mara ya kwanza walicheza mwaka 1971 na Marseille ilishinda na rekodi hiyo iliendelea kwa misimu mitatu mfululizo.

Pia Marseille ilikuja kushinda mchezo wa saba kati ya 11 huku ikipoteza mara moja ambayo ilikuwa katika Coupe de France mnamo Machi 1975. 

Sasa basi katika mchezo wa mwaka 1978 Marseille walitua katika dimba la Parc des Princes ukiwa ni mchezo wa 12 ikiwa imeshinda michezo mitatu kati ya nne iliyopita.

Mbele ya watazamaji 33, 386 wageni hao waliendelea kuongoza ambapo dakika ya 12 ya mchezo walipata bao kupitia kwa nyota wao Sarr Boubacar.

Lakini baadaye PSG walicharuka na kupata uongozi wa mabao 2-1 yaliyotiwa kimiani na Francois Brisson katika dakika ya 29 na Mustapha Dahleb katika dakika ya 44.

Katika kipindi cha pili bao la kujifunga mlinzi wa Marseille Marius Tresor katika dakika ya 46 ilipawa matumaini makubwa PSG wakiongoza kwa mabao 3-1.

Mshambuliaji wa PSG Francois M'Pele alifunga dakika tatu baadaye na bao la tano alifunga katika dakika ya 82 ya mchezo huo hivyo PSG kuongoza kwa 5-1 na ndio yalikuwa matokeo ya siku hiyo. Hata hivyo ushindi wa mabao zaidi ya manne unakuwa kumbukumbu tosha katika derby hiyo ambapo Novemba 1986 Marseille ilishinda kwa mabao 4-0.

Hata hivyo Februari 2017 PSG iliibamiza Marseille kwa mabao 5-1. Kuanzia hapo mpaka sasa PSG inaongoza kwa kushinda dhidi ya Marseille  ikishinda mechi 43 katika michezo 97 waliyokutana huku Marseille ikishinda mechi 32 na sare 22.

Mwaka 2019 Marseille ilitandikwa 4-0 hivyo kuongeza idadi ya mechi za ushindi na idadi ya mabao kufikia 141 huku Marseille wakiwa na mabao 116.