Clint Dempsey: Mmarekani wa kwanza kufunga hat trick EPL

Januari 21, 2012 nyota wa zamani wa kandanda wa Marekani na klabu ya Fulham na Tottenham Clint Dempsey aliweka rekodi ya kuwa raia wa kwanza wa Marekani kufunga mabao matatu yaani hat trick katika mchezo wa Ligi Kuu ya England. 

Hat trick hiyo aliifunga wakati akihudumu na Fulham katika ushindi wa mabao 5-2 kwenye mchezo dhidi ya Newcastle ulichezwa katika dimba la Craven Cottage. Kiungo na mshambuliaji huyo ambaye alikuwa akifahamika kwa jina la Deuce ulikuwa ni ni mwaka wake wa sita katika klabu hiyo ya jijini London tangu alipojiunga Januari ya mwaka 2007 kwa ada ya pauni milioni mbili. 

Alipotua katika viunga vya jiji hilo alijiweka sawa katika kikosi cha kwanza  akicheza zaidi ya mechi 40 kwa kila msimu. Katikati ya msimu wa 2011-12 Fulham ilikuwa ikihaha kujinasua kutoka katika mstari wa kushuka daraja kwenye msimamo wa ligi hiyo  ambapo Newcastle wakiwa miongoni mwa klabu ambazo zilikuwa katika wakati mzuri. 

Katika mzunguko wa kwanza wa Ligi Kuu msimu huo Fulham ilipotua katika dimba la St. James Park ilichezea kichapo cha mabao 2-1. 

Siku ya mchezo hadi kipindi cha kwanza kinamalizika Fulham ilikuwa nyuma kwa bao 1-0 lililofungwa na kiungo wao Danny Guthrie. Lakini wenyeji walirudi katika kipindi cha pili na kurekebisha makosa kwa mkwaju wa penati katika dakika ya 52 uliokwamishwa wavuni na Danny Murphy. 

Dempsey aliliona lango la The Magpies katika dakika ya 59 na 65  hivyo kufanya Fulham, kuwa mbele kwa mabao 3-1. 

Bobby Zamora aliipa bao Fulham katika dakika ya 68 hivyo kupanua zaidi pengo na kuwa mabao 4-1. 

Hartem Ben Arfa alirudisha matumaini ya The Magpies katika dakika ya 85 ili kupunguza pengo hilo lakini Dempsey aliwavunja moyo kabisa alipotua bao lake la tatu na ubao kusomeka mabao 5-2.

Dempsey msimu huo alifunga mabao 23 kabla Tottenham kudaka saini yake mwezi Agosti 2012 kwa ada ya pauni milioni sita. 

Dempsey alizaliwa Machi 9, 1983 huko Nacogdoches, katika jimbo la Texas. 

Alianza maisha yake ya soka na klabu ya New England Revoultion mnamo mwaka 2004 baada ya kumaliza chuo akiwa na klabu ya Furman Paladins. Vyombo vya habari nchini Marekani humchukulia Dempsey kuwa ni nyota mkubwa wa zama zote wa soka nchini humo. 

Alianza kuitumikia timu ya taifa mnamo mwaka 2004 hadi alipostaafu mwaka 2017 akiwa ameifungia mabao 57 katika mechi 141.