Hali ya hewa yarudisha AFCON 2021 mwezi Januari

Shirikisho la Kandanda Africa (CAF) limesema kuwa mashindano yajayo yatafanyika nchini Cameroon kati ya Januari 9 mpaka Februari 6.

Kwa mujibu wa CAF uamuzi huo umefikiwa baada ya kupata ripoti kutoka Cameroon zinazoeleza kuwa kipindi cha Juni kitakuwa kigumu kwa hali ya hewa.

Mabadiliko hayo pia yanamaanisha kuwa mashindano ya Afrika hayataangukia katika wakati sawa na mashindano ya kombe la dunia la vilabu litakalofanyika Uchina Juni 2021.

Kurudishwa kwa majira hayo ya Januari mwaka 2021 kumeibua mjadala wa kandanda baina ya Afika na Ulaya.

Mwezi Januari ni kipindi ambacho ligi za Ulaya zinakuwa katikati na ushindani unakuwa mkubwa, hivyo makocha wengi hawafurahii kuwaachia wachezaji wao nyota kurejea Afrika.

Wachezaji hao nyota wa Afrika hukaa mpaka wiki tano na timu zao za taifa na hukosa mpaka michezo mitano ya ligi na klabu zao.

Mwezi Juni nikipindi kinachopendwa kwa kuwa ligi nyingi za Ulaya huwa kwenye mapumziko.

"Kwa kweli ratiba hiyo (ya mwezi Januari) inakuathiri mno unapofikiria kuwasajili wachezaji kutoka Afrika," kocha wa zamani wa Tottenham Harry Redknapp ameiambia BBC.

"Na kwa hakika (wakirudi) baada ya michuano wanakuwa si kama walivyoondoka. Huwa hawarudi katika kiwango chao baada ya mashindano," amesisitiza.

Vinara wa Ligi ya EPL Liverpool mathalani wanaweza kuwakosa nyota wao tegemezi watatu kutokana na mabadiliko hayo mwakani ambao ni Sadio Mane, Mohamed Salah na Naby Keita kwa mwezi mmoja.