MAKTABA YA JAIZMELA: Laurent-Desire Kabila ni nani?

Januari 18, 2001 alifariki dunia Rais wa Jamhuri ya Kidemokrasi ya Kongo (DRC) Laurent-Desire Kabila. 

Mwanasiasa huyo aliyeingia kwa mtutu wa bunduki kuchukua madaraka hayo baada ya kuuangusha utawala wa Mobutu Sese Seko. Aliuawa akiwa ofisini hali ambayo ilitaka kuliingiza taifa hilo katika vita vya wenyewe kwa wenyewe. Mamlaka za usalama nchini humo zilijitahidi kuweka utulivu licha ya mauaji hayo. 

Kwa mujibu wa Waziri wa Afya wakati huo Leonard Mashako Mamba alisema Kabila aliuawa na kupoteza maisha papo hapo. 

Waziri huyo aliongeza kuwa wakati akiuawa yeye alikuwa mlango wa pili na kwamba aliposikia kishindo alikimbia haraka kwenda kwenye tukio. Awali ilielezwa kuwa aliwahishwa hospitalini nchini Zimbabwe. 

Serikali ya DRC ilitangaza Januari 18, 2001 kuwa Kabila alifariki kwa majeraha ya risasi mwilini mwake. Wiki moja mwili wake ulirudishwa nchini humo kwa ajili ya maziko na siku 10 baadaye mtoto wake Joseph Kabila alikuwa Rais wa taifa hilo. 

Uamuzi huo ulifikiwa baada ya ushuhuda wa mdomo uliotolewa na Waziri wa Sheria na Haki wakati huo Mwenze Kongolo kuwa Laurent-Desire Kabila aliwahi kuwaambia kwa mdomo maafisa wake kuwa endapo atauawa akiwa ofisini basi mtoto wake Joseph atachukua mahali pake. 

Hivyo walitimiza matakwa ya marehemu na Joseph akawa Rais wa Jamhuri ya Kidemokrasi ya Kongo. Uchunguzi kuhusu mauaji wa mwanasiasa huyo uliwapandisha kizimbani watu 135 wakiwamo watoto wanne. 

Kanali Eddy Kapend ambaye alikuwa miongoni mwa mabinamu wa Kabila na wengine 25 walihukumiwa kunyongwa hadi kufa Januari 2003 lakini hawakunyongwa. Wengine 64 walitupwa jela kuanzia miezi sita hadi kifungo cha maisha na wengine akali ya 45 waliachiwa huru. 

Pia kutokana na mauaji hayo wengine walikumbana na mkono wa sheria kwamba walitaka kumuua mtoto wake ili asiweze kukalia kiti hicho, miongoni mwa hao alikuwa mshauri wa karibu na muhimu wa Kabila aliyefahamika kwa jina la Emmanuel Dungia ambaye aliwahi kuwa balozi wa zamani nchini Afrika Kusini. 

Walio wengi wanaamini hadi leo kwamba wengi wa waliohukumiwa ni wasio na hatia. Kabila aliingia madarakani mnamo mwaka 1997. 

Enzi za utawala wake alikuwa mfuatiliaji wa siasa za Marx lakini sera zake alizichanganya na Ubepari na Ujamaa. 

Kabila aliwahi kutangaza kwamba uchaguzi hautafanyika nchini humo kwa miaka miwili ili aweze kupata muda wa kupanga vizuri utaratibu nchini humo. Sera za Kabila zilitofautiana na mtangulizi wake  kwani zilijawa na ubabe, rushwa na ukiukwaji wa haki za binadamu. 

Miaka ya mwanzoni wakati wa utawala wake alianza kufahamika kwa jina la ‘Mobutu mwingine’. 

Mnamo mwaka 1998 waliokuwa washirika wake nchini Uganda na Rwanda walimgeuka na kutaka mapinduzi kwa tiketi ya Rally for Congolese Democracy (RCD) ambayo ilileta vita ya pili ya Kongo. Hata hivyo Kabila alipata washirika wapya Angola, Namibia na Zimbabwe.  

Kupata kwake washirika wapya kulimsaidia sana Kabila kushikilia upande wa Kusini na Magharibi mwa DR Congo. Mnamo Julai 1999 mazungumzo ya amani yalifanyika ambayo yaliondoa majeshi mengi ya kigeni nchini humo. 

Harakati za kutaka kiti hicho zilianza tangu miaka ya 1960 hadi alipofanikia miongo mitatu baadaye. Laurent-Desire Kabila alizaliwa Novemba 27, 1939 mjini Baudouinville katika jimbo la Katanga ambapo kwa sasa kunafahamika kwa jina la Moba katika Jimbo la Tanganyika. Kabila ni mtu wa jamii ya Waluba. Baba yake alikuwa Mluba na mama yake alikuwa wa jamii ya Walunda. 

Kabila aliwahi kusema kuwa alisoma Falsafa ya Siasa jijini Paris, PhD yake aliipata Tashkent, Belgrade na Dar es Salaam; lakini hakuna uthibitisho kuwa alipita huko.