Mambo 5 muhimu ya Waziri Mkuu kwa Watumishi wa Serikali

Waziri Mkuu Kassim Majaliwa Julai 18, 2019 katika ukumbi wa mikutano wa ndani kwa Watumishi wa Serikali.

WAZIRI MKUU wa Jamhuri ya Muungano wa Tanzania Kassim Majaliwa amewataka watumishi wa umma katika wilaya na mikoa nchini kufanya kazi kulingana na falsafa ya kiongozi wa nchi ambaye kwa sasa ni Rais Dkt. John Pombe Magufuli ili kuwaletea wananchi maendeleo.

1. KUFANYA KAZI KWA KUFUATA PHILOSOPHY YA JPM

Akizungumza katika mkutano wa ndani na watumishi wa serikali kutoka wilaya za Moshi Mjini, Mwanga na Same katika ziara yake mkoani Kilimanjaro iliyokwenda sambamba na uzinduzi wa Uboreshaji wa Daftari la Kudumu la Wapiga Kura Julai 18 mwaka huu, Waziri Mkuu Majaliwa alisema kumekuwa na watumishi wa serikali ambao wamekuwa wakifanya kinyume na matakwa ya kiongozi wa nchi hali inayosababisha mambo kwenda mrama katika taasisi za umma.

“Fanya kazi kwa maelekezo ya kiongozi wa nchi, iga philosophy (falsafa) yake, itakurahisishia kufanya kazi bila wasiwasi wowote. Wafanyakazi wengi wamekuwa wakishindwa kutekeleza majukumu yao kwa kushindwa kufuata falsafa ya kiongozi wa nchi,” alisema Majaliwa.

2. KUACHA UBAGUZI WA KISIASA, UKABILA NA UWEZO WA MTU

Katika mkutano huo wa ndani wa kuwakumbusha watumishi wa serikali wajibu wao Waziri Mkuu aliwataka watumishi hao kuondokana na ubaguzi wa rangi, ukabila, vyama vya siasa na uwezo wao kwani kwa kufanya hivyo maendeleo ya nchi yatafikiwa bila wasiwasi.

“Usiwe sehemu ya kuifanya serikali kuwa ya hovyo, msimamo wa serikali hii haumlindi mtumishi yeyote wa serikali endapo atathibitika kufanya hayo,” alisisitiza Waziri Mkuu.

Aidha Waziri Mkuu aliwataka watumishi wa serikali katika halmashauri zao kuheshimiana na kutambuana ili kujenga mahusiano bora mahali pa kazi.

3. KUHESHIMIANA ILI KUJENGA MAHUSIANO MAZURI

“Msipotambuana mtavurugana, mnapaswa kuheshimiana kila mmoja kwa nafasi yake, kila mmoja akijiona yupo juu ya mwenzake hakutakuwa na mahusiano mazuri,” alisema Majaliwa.

Majaliwa aliongeza kuwa kuna umuhimu wa kutambua mamlaka na kufanya kazi kama timu ili kuijenga nchi ya Tanzania, kutokana na ukweli kwamba kumekuwa na tabia ya baadhi ya wafanyakazi wa halmashauri fulani fulani nchini kudharau madiwani na kuwaona sio kitu.

“Kuna majimbo na wilaya hapa nchini hazielewani. Isipokuwa sijasikia kwa hapa 

Kilimanjaro, naona pako shwari…ni jambo zuri na la kupongeza,” alisema Waziri Mkuu.

Hata hivyo Waziri Mkuu aliwataka wakuu wa idara katika halmashauri husika wasiwe wachoyo katika kutoa nafasi kwa watumishi wengine kupata uzoefu katika kazi ili kujenga serikali imara.

4. WAKUU WA IDARA NA KUJENGA TEAM WORK

“Gawanya majukumu, wapeni nafasi ndani ya idara, kila siku semina ni wewe tu, mara Dar, mara Dodoma, wakiona umevaa suti nzuri wanafikiri ni fedha za kwenye safari zako, maana hutulii ofisini…wape nafasi muwe na lugha moja,” aliongeza.

5. MATUMIZI YA LUGHA RAHISI KUWASILISHA UJUMBE

Waziri mkuu aliwataka watumishi wa serikali kuachana na kauli za kuwatisha wananchi, na kuwataka kutumia kauli nyepesi zenye kueleweka ili kutengeneza jamii ambayo itakuwa na ushirikiano kwani serikali haina uwezo wa kufanya kila kitu isipokuwa kwa ushirikiano na wananchi inaweza.

Ziara ya Waziri Mkuu katika Mkoa wa Kilimanjaro ni ya pili baada ya ile ya kwanza aliyozuru wilaya za Siha, Hai na Rombo na sasa akizuru Moshi Mjini, Mwanga na Same.

STORY BY: Jabir Johnson  Moshi…Julai 18, 2019