Baada ya miaka 17, wakazi wa Moshi waliona Treni, Waziri Mkuu Majaliwa alipokea

Waziri Mkuu  Kassim Majaliwa  ameagiza vijana wote waliohusika katika ujenzi wa reli ya kutoka Dar es Salaam, Tanga hadi Moshi ambao kwa sasa ni vibarua wanapaswa kubadilishwa na kuwa watumishi wa kudumu wa shirika la Reli Tanzania  (TRC).

Akizungumza wakati akilipokea treni la kwanza mjini Moshi, baada ya kutoonekana kwa miaka 17 Waziri Mkuu Majaliwa alisema

“Hawa waliofanya kazi hii , ambao ni vibarua sasa wanapaswa wabadilishwe wawe watumishi wa kudumu ili waweze kupata ajira za kudumu kwenye eneo hili,  nataka ajira zao zikamilike kwa wakati ili waendelee kuitunza reli hii , wataikarabati, na wao watakuwa sasa watumishi ambao watakaoendelea kuifanya reli hii iwe inafanya kazi siku zote bila ya mtu yeyote kudokoa chuma.”

Aidha Waziri Mkuu Majaliwa alisema kukamilika kwa reli hiyo kutaongeza ufanisi wa usafirishaji wa shehena ya mizigo, hivyo kuliongezea shirika mapato zaidi.

“Jitihada hizi zinafanywa na serikali lengo likiwa ni kufikisha huduma kwa wananchi wote wakiwamo wananchi wa mkoa wa Kilimanjaro,” alisisitiza Waziri Mkuu Majaliwa.

Waziri Mkuu Kassim Majaliwa, akiwapungia mikono wananchi waliyofika kushuhudia uzinduzi wa treni ya mizigo katika reli ya Kaskazini uliyofanyika katika stesheni ya reli Moshi, Julai 20.2019. (PICHA ZOTE KWA HISANI YA WAZO HURU BLOG)

Vibarua wa Shirika la Reli Tanzania (TRC) waliongaziwa nuru na Waziri Mkuu Kassim Majaliwa baada ya kulipokea treni la mizigo mjini Moshi Julai 20, 2019.