Jux, Nandy kupamba Miss Kilimanjaro 2019

Jux

Nandy

Kinyang’anyiro cha kumpata Mlimbwende wa Mkoa wa Kilimanjaro mwaka huu (Miss Kilimanjaro 2019) yanatarajiwa kufanyika hii leo mjini Moshi.

Wasanii watakaopamba kinyang'anyiro hicho kitakachofanyika Kili Home ni Jux na Nandy.

Akizungumza na Tanzania Daima Mkurugenzi wa taasisi Dees Bridal & Entertainment Dotto Olafsen alisema maandalizi ya mashindano hayo yamekamilika kilichobaki ni warembo waonyeshe uwezo wao katika jukwaa kuwania nafasi ya tatu za juu kuwakilisha mkoa katika michuano ya kanda.  

“ Kinyang’anyiro hiki kitafanyika Kili Home hapa mjini Moshi, ninaamini mashindano ya safari hii yatafana sana kwani tumewapika vya kutosha kilichobaki ni wao wenyewe kuwania taji la mwaka huu,” alisema Olafsen.

Hata hivyo Olafsen alitaja viingilio vya kinyang’anyiro hicho VIP A itakuwa Shilingi 200,000/=, VIP B itakuwa Shilingi 40,000/= na Kawaida itakuwa ni Shilingi 10,000/=.

Walimbwende hao ambao wametoka katika fani mbalimbali ikiwamo walimu, wafanyabiashara, madaktari na wanafunzi wa vyuo vikuu watachukua vikali kuwania taji hilo.

Walimbwende hao walizuru Shule ya Sekondari ya Machame Girls ikiwa ni sehemu ya kutoa hamasa kwa wanafunzi kujitambua na wajibu wanaotakiwa kuutenda.

Mbali na hilo walimbwende hao walipata kuhudhuria Siku ya Mtoto wa Afrika ambayo Manispaa ya Moshi iliadhimisha Juni 15 mwaka huu katika shule ya sekondari ya Majengo ili kuhamasisha jamii kuhusu malezi ya watoto ili kuwaepusha na vitendo vya ukatili.

“Katika kampeni yetu hiyo ya kuzuia mimba za utotoni tumegundua kuwa, baadhi ya watoto tayari wameshaathiriwa na tatizo hilo na kuachishwa masomo kwani serikali hairuhusu mwanafunzi aliyezaa kuendelea na masomo, ” alisema Olafsen.  

Olafsen aliongeza kuwa kambi ya walimbwende hao imedumu kwa takribani miezi miwili ambapo katika kambi hiyo walikuwa wakifanya  mazoezi na kufanya shughuli za kijamii.

STORY BY: Jabir Johnson