EU mbioni kuiwekea vikwazo Venezuela

Rais Nicolas Maduro yupo katika mbinyo na shinikizo kubwa kutoka mataifa ya magharibi na washirika wake; yakimtaka kuachia kiti hicho.

Umoja wa Ulaya unajitayarisha kuweka vikwazo zaidi dhidi ya Venezuela vikiwalenga maafisa ambao wanashutumiwa kuhusika na mateso na ukiukaji mwingine wa haki za binadamu. 

Mkuu wa sera za mambo ya nje wa Umoja wa Ulaya Federica Mogherini amesema katika taarifa leo kuwa Umoja huo unafanyakazi pamoja na Umoja wa Mataifa kuhakikisha kuwa haki za binadamu zinaheshimiwa nchini Venezuela kufuatia ripoti za ukiukaji unaofanywa na majeshi ya usalama. 

Mogherini amesema kuwa Umoja wa Ulaya uko tayari kufanyakazi kuelekea kuweka vikwazo vya malengo maalum kwa wanajeshi mmoja mmoja wa majeshi ya usalama waliohusika na utesaji pamoja na ukiukaji mwingine mkubwa wa haki za binadamu. 

Umoja wa Ulaya umeiwekea vikwazo Venezuela tangu mwaka 2017, ikiwa ni pamoja na vya silaha pamoja na vifaa vinavyotumika kufanya utesaji.