Viongozi wa vyama vya ushirika waonywa kuhusu mikataba

Mrajisi Msaidizi wa Vyama vya Ushirika mkoa wa Kilimanjaro Joseph Henjewele (mwenye kipaza sauti) akitambulisha wajumbe wa mkutano wa 35 wa KNCU uliofanyika Julai 30, 2019 mjini Moshi. 

Viongozi wa Vyama vya Ushirika mkoa wa Kilimanjaro wametakiwa kuacha mara moja kuingia mikataba pasipo kufuata kanuni, taratibu na sheria zinazotakiwa ili kuepusha migongano ya kimaslahi ndani ya vyama hivyo.

Akizungumza katika Mkutano Mkuu wa 35 wa KNCU uliofanyika mjini Moshi mkoani humo, Mrajisi Msaidizi wa Vyama vya Ushirika mkoa wa Kilimanjaro Joseph Henjewele alisema vyama vya Ushirika vimekuwa sehemu muhimu ya maendeleo ya Tanzania na Serikali inauona ushirika kuwa ni muhimu katika kufanikisha malengo ya maendeleo.

“Inapotokea viongozi wanaingia mikataba isiyo na tija kwa vyama vya ushirika inaleta kero na matatizo yanazidi badala ya kuwaletea watu maendeleo,” alisema Henjewele.

Henjewele alisema mikataba ya jinsi hiyo haipaswi kupewa nafasi katika vyama vya ushirika na kwamba hakutakuwa na uvumilivu kwa viongozi watakaofanya hivyo.

“Mkataba kabla haujasainiwa unatakiwa ufike kwa mrajisi ili aweze kuupitia ikishindikana unapelekwa katika ngazi za juu ili kuondoa mikataba isiyo na tija,” aliongeza Henjewele.

Aidha Henjewele aliwataka viongozi kuacha kupitia vichochoroni kupitisha mikataba hiyo na badala yake wapitie kwenye mkutano mkuu wa chama husika cha ushirika hatua ambayo itamwondolea usumbufu na kumweka huru.

“Watu wanaofanya kazi pamoja wanaweza kutatua matatizo ambayo hayawezi kutatuliwa na mtu mmoja mmoja. Kupitia kwenye mkutano mkuu kutakuweka huru,” alisisitiza Henjewele.

Wajumbe wa Mkutano wa 35 wa KNCU, Julai 30, 2019 mjini Moshi, Kilimanjaro.

STORY BY: Jabir Johnson, Moshi…..Julai 30, 2019; PHOTO BY: Joseph Tesha

Read More

Kiwanda cha Kukoboa Mpunga charudishwa serikalini

Wajumbe wa Tume maalum iliyoundwa na Waziri Mkuu Kassim Majaliwa kufuatilia madeni katika vyama vya ushirika Tanzania wakiwa mkoani Kilimanjaro Julai 30, 2019.

Chama Kikuu cha Ushirika Mkoa wa Kilimanjaro KNCU (1984) Limited, kimefanikiwa kukirejesha mikononi mwa serikali kiwanda cha kukoboa mpunga cha Kilimanjaro Paddy Huling Company Limited (KPHC) ambacho Chama hicho  kilikabidhiwa na serikali  kwa mkataba wa ukodishaji tangu mwaka 1991.

Hayo yamebainishwa na Mwenyekiti wa KNCU Prof. John Boshe kwenye Mkutano Mkuu wa 35 uliofanyika katika ukumbi wa mikutano wa Coffee Tree Hotel  uliopo mjini Moshi mkoani hapa.

Prof. Boshe alisema kuwa kabla ya kukikabidhi kiwanda hicho KNCU walifanya tathmini ya hali ya kiwanda hicho na kuonekana kwamba kiwanda hicho hakitakuwa na tija tena kwa Chama hicho  kwani kimeendelea kuwa mzigo kwa Union.

“Ndugu wajumbe wa mkutano Mkuu , tulipokea barua ya serikali yenye kumb. Namba CKB.85/366/01/57 ya Julai 2018 ambayo ilikuwa ikituelekeza kwamba tunatakiwa kukabidhi kiwanda hiki cha kukobolea mpunga kilichopo Chekereni,”alisema Prof. Boshe.

Alisema KNCU ilikabidhiwa na serikali kiwanda hicho cha kukobolea mpunga mwaka 1991 lakini kutokana na changamoto zilizojitokeza kiwanda hicho hakikuweza tena kuendelea kufanya kazi jambo ambalo limeendela kuwa mzigo kwa KNCU kwa kuendelea kulimbikiza madeni yakiwemo ya kulipia pango la kodi ambayo ilikuwa hailipi kwa muda mrefu ya kiasi cha shilingi 200,000 kwa kila mwezi.

Alifafanua kwamba KNCU ilikikabidhi kiwanda hicho kwa Ofisi ya Msajili wa Hazina hati miliki ya kiwanda hicho hivyo kupitia mkutano huu napenda kuwataarifu kwenu kuwa kiwanda.

Mkutano wa 35 wa KNCU Julai 30, 2019

STORY BY: Kija Elias, Moshi... Julai 30,2019; PHOTO BY: Joseph Tesha

Read More

Jukwaa la Walimu Wazalendo Kilimanjaro latoa saruji mifuko 547

Katibu wa Itikadi na Uenezi wa Chama cha Mapinduzi (CCM) Humphrey Polepole.

Jukwaa la Walimu Wazalendo wa shule za msingi na sekondari Mkoa wa Kilimanjaro,  wameunga mkono juhudi za utendaji kazi ambazo zinafanywa na rais Dkt. John Pombe  Magufuli  kwa kutoa, mifuko ya saruji  547 kwa ajili ya kuunga mkono shughuli za maendeleo mkoani humo.

Akizungumza mara baadha ya  kukabidhi  mifuko hiyo ya saruji kwa Katibu wa Itikadi na Uenezi (CCM) Taifa,  Mwenyekiti wa Jukwaa la Walimu Wazalendo mkoa wa Kilimanjaro George Madaraka, alisema mchango huo umetolewa kutoka kwa Walimu Wazalendo kutokana na kutambua mchango wa serikali ya awamu ya tano katika utoaji wa elimu pasipo malipo.

“Kutokana na jinsi serikali  inavyotekeleza miradi mbalimbali ya maendeleo, nasi tumeona ni vema kuiunga mkono kwa kuchangia saruji  mifuko 232 ili kusaidia ujenzi wa vyumba vya madarasa, vyoo vya wasichana na wavulana pamoja na kujenga kituo cha polisi Usangi wilaya ya Mwanga,”alisema Madaraka.

Madaraka alisema Jukwaa la Walimu Wazalendo waliweza kujichanga na kufanikisha kupata mifuko ya saruji 232 ambayo waliikabidhi kwa Katibu wa Itikadi na Uenezi wa Chama Cha Mapinduzi (CCM) Humphrey Polepole.

Kwa Upande wake mgeni rasmi ambaye alizindua Jukwaa la Walimu wazalendo Katibu wa Itikadi na Uenezi wa Chama Cha Mapinduzi (CCM) Humphrey Polepole,  pia aliwasaidi kuendesha harambee na kuwezesha kupatikana mifuko ya saruji 315, ambapo yeye mwenyewe alichangia mifuko ya saruji 30.

“Niwapongeze kwa kazi kubwa mliyoifanya Jukwaa la Walimu Wazalendo mkoa wa Kilimanjaro, katika kuunga mkono jitihada za serikali,”alisema Polepole.

“Naomba nielekeze mifuko hii iliyopatikana hapa, mifuko ya saruji 127 ipelekwe Wilaya ya Mwanga kwa ajili ya ujenzi wa kituo cha polisi Usangi,  pia mifuko ya saruji 30 ipelekwe katika Wilaya ya Rombo kwa lengo la kujenga  matundu ya vyoo katika shule, huku mifuko itakayobaki 370 Katibu wa CCM mkoa ataelekeza wapi ipelekwe kwa ajili ya kusaidia maendeleo,”alisema.

Nae Afisa Elimu Mkoa wa Kilimanjaro Paulina Nkwama, alisema kuhusiana na elimu msingi bila malipo mkoa huo, unapokea shilingi takriban bilioni 1.27 kila mwezi , ambazo zinawasaidia katika masuala ya uendeshaji wa shule pamoja na posho ya madaraka kwa viongozi.

Aidha alisema katika mwaka wa fedha wa 2018/2019 mkoa umepokea takriban shilingi bilioni 3.5 kwa ajili ya ujenzi wa miundombinu, jambo ambalo wanaendelea kuipongeza serikali.

STORY BY: Kija Elias na Jabir Johnson, Moshi….Julai 29, 2019

Jukwaa la Walimu Wazalendo wa shule za msingi na sekondari Mkoa wa Kilimanjaro, katika picha ya pamoja na Humphrey Polepole.

Read More

Ifahamu siku ya Vipapatio vya Kuku Kimataifa

Leo ni siku ya vipapatio vya kuku. Kila Julai 29 kila mwaka ni maalum kwa ajili ya Vipapatio vya Kuku. 

Imeelezwa na wataalamu wa masuala ya lishe kuwa kwa mwaka tunakula vipapatio 290. 

Hakika ni miongoni mwa viungo vitamu ambavyo huliwa na wengi. Nchini Marekani vimekuwa vikifahamika kama Buffalo Wings. Kipapatio cha kuku kimegawanyika sehemu kuu tatu “wingette, drumette na tip.” 

Utamaduni wa vipapatio vya kuku nchini Tanzania umekuwa tofauti kutokana na eneo. Watu wa pwani hufurahia sana ulaji wa vipapatio. 

Lakini maeneo mengi ya bara vipapatio hupewa watoto na mgeni wa heshima huwezi kumwekea nyama hiyo. Kwa ufupi sikukuu hii ilianza kuadhimishwa mwaka 1977 katika mji wa Buffalo jijini New York nchini Marekani. 

Mkoani Kilimanjaro na kanda ya kaskazini kwa mara ya kwanza siku hii ilisikika katika vyombo vya habari Jumatatu ya Julai 29, 2019 katika kituo cha Redio Kili FM mjini Moshi katika kipindi cha Kili Breakfast (saa 12:30 hadi 4:00 asubuhi) kupitia mtangazaji wa kipindi hicho Johnson Jabir ambaye aliendesha mjadala kuhusu vipapatio vya kuku. 

Je unafahamu namna ya kuandaa vipapatio vya kuku hadi kuwa mlo kamili.

MAHITAJI

Vipapatio hivi vya kuku unaweza kuvipika na kula kama kitafunwa wakati wa kupumzika na familia au wakati wa vikao muhimu na marafiki.

·        Vipapatio vya kuku 10 (Unaweza kuwa na idadi yeyote, kutegemea na walaji)

·        Vijiko 5 vya sauce ya pilipili (Unaweza pia kuwa na pilipili ya kuongezea)

·        Siki iliyochujwa (distilled Vinegar)

·        Mafuta ya kukaangia (Vizuri kama ukiwa na mafuta yanayotokana na mimea)

·        Vijiko 4 vya majarini (siagi au margarine)

·        Chumvi

·        Pilipili (hii ya kuongeza utamu)

·        Pilipili manga

Vitu vya ziada kwa kuku (si lazima)

·        Kitunguu saumu cha unga

·        Tangawizi

·        Limao

Tunatengeneza hiki chakula katika sehemu mbili tofauti - tutakaanga kuku, wakati huo huo tutapika sauce yetu ya pilipili. Kumbuka vipapatio vinapaswa viive vizuri hadi vikauke na kubadilika rangi. Inachukua kama dakika 10 hivi. Toa vipapatio vyako na weka kwenye tissue paper, ili wachuje mafuta vizuri.

Read More

MAKTABA YA JAIZMELA: Benito Mussolini ni nani?

Benito Mussolini alikuwa mkuu wa serikali ya Italia kutoka mwaka 1922 hadi 1943. 

Huyu ndiye mwanzilishi wa Ufashisti na anachukuliwa na ulimwengu wa magharibi kuwa ni dikteta kutokana na namna alivyokuwa akiwaongoza raia wake katika taifa hilo la Italia.

Aliiongoza Italia katika vita tatu na ya mwisho alishindwa mbele ya watu wake. Musssolini alizaliwa Julai 29, 1883 na kufariki dunia Aprili 28, 1948.  Mussolini alizaliwa katika kitongoji cha Dovia di Predappio hapo hapo nchini Italia. 

Kwa hakika alizaliwa katika familia masikini mno ambayo ilikuwa ikiishi katika nyumba ya vyumba viwili tu. Baba yake alikuwa mfua vyuma na mfuasi wa falsafa ya ujamaa (mfumo wa maisha ambao ulikuwa ukiruhusu kushirikiana katika ardhi na vitu kwa usawa miongoni mwa jamii). 

Mama yake alikuwa mwalimu wa shule ya chekechekea. Licha ya kuwa na akili tangu utoto wake lakini Benito alikuwa ni mtu wa vurugu siku zote za maisha yake. Alikuwa mwanafunzi maskini hivyo hakuwa na muda mzuri wa kujifunza mambo mengi. Baadaye alifanikiwa kwenda katika shule ya bweni ya Faenza, Italia. 

Akiwa huko alifanya tukio la kuogofya pale alipomchoma kisu mwanafunzi mwenzake, hatimaye alifukuzwa shule. Baada ya kupata Astashahada yake mwaka 1901 aliingia katika kazi ya mama yake ya ualimu ambako yeye alifundisha sekondari. 

Mwaka 1902 alikwenda Uswisi ukiwa ni mpango wake wa kutoroka ili asiweze kwenda jeshini, akiwa huko alijiunga na wanaujamaa wengine. Alirudi Italia mwaka 1904 ambapo alitumia muda wake mwingi jeshini na katika siasa kikamilifu. 

Mussolini alikuwa mwanachama wa chama cha Kijamaa tangu mwaka 1900 na akiwa humo ndipo alipoanza kuwa na mvuto kwa wengi. Katika hotuba zake na makala zake alikuwa mkali na mwenye vurugu, mwenye kukosoa mapinduzi kwa gharama. Mussolini aliwahi kuwa mhariri wa gazeti la chama la kila siku la Avanti. Wakati huo akiwa na umri wa miaka 29. 

Kinachovutia kwa Mussolini ni kwamba alifanya mapinduzi katika muda mwafaka ambapo watu wa ardhi ile walikuwa wakiihitaji. 

Pia alikuwa akijua kuwa vita ya kwanza ya dunia itaizika Ulaya ya zamani na kuanza Ulaya isiyojulikana. Hivyo akaanzisha gazeti lake la Popolo d’Italia ambalo alilitumia kueneza falsafa yake ya Ufashisti.

Read More

Maelfu ya Watunisia wamuaga Beji Caid Essebsi

Maelfu wa Watunisia na viongozi wa mataifa mbalimbali wamejitokeza leo kuuaga mwili wa aliyekuwa rais wa kwanza aliyechaguliwa kwa njia za kidemokrasia, Beji Caid Essebsi ambae amefariki akiwa na umri wa miaka 92, akiliacha taifa hilo la Afrika ya Kaskazini likikabiliwa na wasiwasi mpya wa kisiasa. 

Maelfu ya raia walijipanga barabarani kutoa heshima zao za mwisho, wakati mwili wa marehemu ulipokuwa ukipitishwa huku wakisema "Maisha Marefu Tunisia" na kupeperusha bendera ya taifa lao yenye rangi nyekundu na nyeupe. 

Mfalme wa Uhispania, rais wa Ufaransa na Mfalme wa Qatar Tamim bin Hamad Al-Thani na rais wa mpito wa Algeria Abdelkader Bensalah walihudhuria ibada ya mazishi iliyofanyika katika makazi ya rais mjini Tunis. 

Usalama uliimarishwa vikali baada ya kuwepo kwa kitisho cha ugaidi chenye kuhusishwa na kundi la Dola la Kiislamu. 

Rais Essebsi ambae atazikiwa umbali wa kilometa 7 kutoka katika makazi ya rais, alichaguliwa kuiongoza Tunisia Desemba 2014 kukikamilisha kidemokrasia ya kipindi cha mpito katika nchi hiyo baada ya vuguvugu la mapinduzi ya wananchi mwaka 2011 lililomuondowa madarakani mtawala wa kiimla Zine Ebadine Ben Ali aliyeitawala nchi hiyo kwa muda mrefu.

CHANZO: DW

Read More

Bilioni 3.1 zatumika miradi majisafi Siha

Wilaya ya Siha, mkoani Kilimanjaro imefanikiwa kutekeleza miradi ya maji safi na salama kwa ajili ya wananchi wa wilaya hiyo, ambapo zaidi ya Tsh. bilioni 3.1 zimetumika katika kutekeleza miradi hiyo.

Hayo yameelezwa na mkurugenzi wa halmashauri ya wilaya ya Siha, Valerian Juwal, wakati alipotembelea na kukagua miradi ya maji iliyotekelezwa na inayoendelea kutekelezwa wilayani humo, hivi karibuni.

“Serikali imeweka kipaumbele katika utekelezaji wa miradi kadhaa ambayo inalenga kuboresha maisha ya watu moja kwa moja na miradi ya maji ni moja wapo ya mpango huo na ndiyo maana na sisi wilayani hapa tumeweka mikakati ya kuhakikisha azma hiyo inafanikiwa”, alisema.

Alisema kuwa miradi ya maji iliyotekelezwa na inayoendelea kutekelezwa wilayani humo ni pamoja na ule mradi wa maji wa Magadini-Makiwaru ambao alisema unatekelezwa kwa kufanyiwa upanuzi na ukarabati.

“Mradi huu unagharimu jumla ya Tsh. 1,218,470,359.50, ambapo utawanufaisha wananchi wa vijiji vya Wiri, Mawasiliano, Kandashi, Olkolili na Mkombozi”, alisema.

Juwal aliendelea kusema  mrdai mwingine ni ule wa Lawate-Fuka, uliogharimu jumla ya Tsh. 1,499,918,959.43, ambao umehusisha upanuzi na ukarabati, ambao alisema kukamilika kwake kutawanuifaisha wakazi wa vijiji vya Kishisha, Embukoi, Ngaritati na Naibili.

Aliendelea kusema kuwa mradi mwingine ni ujenzi na upanuzi kwa mradi wa Losaa-KIA, ambao utanufaisha wananchi wa eneo la Munge kwa Lazaro Letiyo, Kiruswa-Sinai, Kwa Daniel Philipo na mtaa wa Kobil, ambao alisema umegharimu Tsh. 25,593,000.000.

“Mwingine ni ujenzi wa mradi wa maji wa Magadini Makiwaru kutoka Gararagua-Dutchcorner kwenda Kilingi, Kilali, Melari na Sanya Hoyee, ambao unagharimu Tsh. 368,755,475.05”, alisema.

Aidha aliutaja mradi mwingine kuwa ni ule wa Magadini-Makiwaru, unaotoka Dutchcorner kwenda tawi la Kilali, uliogharimu Tsh. milioni 70, ambao alisema utahusisha ujenzi wa vituo nane vya kuchotea maji.

Read More

Kwaheri Theresa May, Karibu Boris Johnson

Theresa May

Julai 24, 2019 Boris Johnson aliyekuwa Waziri wa zamani wa mambo ya kigeni wa Uingereza alichaguliwa kuwa kiongozi wa chama tawala cha Conservatives nchini humo kuchukua nafasi ya Bi Theresa May. 

Hii ilimaanisha Boris Johnson sasa atakuwa Waziri Mkuu mpya wa Uingereza baada ya May kutangaza kujiuzulu mwezi uliyopita.Boris aliye na miaka 55 alimshinda mpinzani wake Jeremy Hunt kwa wingi wa kura katika uchaguzi huo. 

Boris Johnson anatazamiwa kuapishwa rasmi kama Waziri Mkuu wa Uingereza. Johnson pia anatarajiwa kutangaza majina ya kundi atakalolipa majukumu ya kuendesha mchakato wa kuiondoa Uingereza katika Umoja wa Ulaya. 

Boris Johnson ataanza kuiongoza Uingereza kuanzia hii leo mchana wakati Waziri Mkuu Theresa May atakapomkabidhi rasmi mkoba huo wa uongozi. May alitangaza kujiuzulu mwezi uliyopita baada ya kushindwa kuwashawishi wabunge kuunga mkono mapendekezo yake ya kuiondoa nchi hiyo katika Umoja wa Ulaya. 

Boris anaingia katika ofisi ya Downing Street wakati Uingereza ikiwa imegawika juu ya suala la Brexit na kudhoofika kutokana na mgogoro huo wa kisiasa wa miaka mitatu tangu kura ya maoni ya kujiondoa katika Umoja huo ilipopigwa.

Boris Johnson

Read More