Mama na bintiye wauawa kikatili Kenya

Kikongwe mwenye umri wa miaka 73 na binti yake mwenye umri wa miaka 47 wamekutwa wamekufa huku miili yao ikiwa kwenye vyumba tofauti. 

Maofisa wa Polisi wa Nairobi wamesema tukio hilo la kikatili limetokea katika South B Estate jijini Nairobi. 

Kikongwe ametambuliwa kwa jina la Judy Wanjiku Mwai na binti yake Catherine Nyaguthi Mwai na kwamba mauaji hayo yalitokea siku ya Jumapili katika nyumba waliyokuwa wakiishi peke yao iliyopo katika viunga vya Golden Gate. 

Miili ya marehemu hao imegunduliwa jana jioni baada ya ndugu yao mmoja kwenda katika nyumba hiyo akiwa na madhumuni ya kuwasalimia. Mashuhuda wa tukio hilo wamesema kwa mara ya mwisho marehemu hao waliwaona siku ya Jumapili mchana wakati wanashushwa na gari jeusi. 

Marehemu wote walikuwa waajiriwa wastaafu ambapo kikongwe alikuwa mhasibu na bintiye alikuwa mfanyakazi wa benki. Imeelezwa kuwa wakati ndugu yao alipofika katika nyumba hiyo alibisha hodi bila kuitikiwa hivyo ilimbidi aingie ndani ambako alikutana na miili ya ndugu zake ikiwa katika vyumba viwili tofauti na ndipo aliporipoti polisi. 

Maofisa wa Polisi wamesema mwili kikongwe huyo ulikutwa na kamba ya katani shingoni na kwamba mwili ulilazwa kwenye kitanda ukiwa na kamba shingoni ambayo ilikuwa imefungwa kwenye tendegu la kitanda. Pia imeelezwa damu zilikuwa zikitoka mdomoni. 

Mwili wa Nyaguthi ulikuwa katika sakafu ya chumba chake ukiwa na majeraha katika shingo hali iliyoonyesha kulikuwa na purukushani. 

Majirani wamesema hawakuwapo katika eneo hilo wakati wa tukio. Hata hivyo Polisi imesema upelelezi wa awali unaonyesha katika tukio hilo watu zaidi ya wawili wamehusika katika ukatili huo. 

Hakuna kitu chochote ambacho kimeibiwa katika nyumba hiyo kwani simu za marehemu walikutwa nazo. 

Mkuu wa Polisi wa Nairobi Phillip Ndolo amesema hadi sasa hakuna mtu aliyekamatwa kutokana na mauaji hayo na kwamba kwa sasa bado upelelezi ukiendelea kujua chanzo cha mauaji hayo.

CHANZO: STANDARD