MAKTABA YA JAIZMELA: Michel Temer ni nani?

Septemba 23, 1940 alizaliwa mwanasheria na mwanasiasa wa Brazili Michel Temer ambaye baadaye alikuja kuwa Rais wa taifa hilo kubwa katika bara la Amerika ya Kusini. 

Jina lake halisi ni Michel Miguel Elias Temer Lulia. Alizaliwa katika kitongoji cha Tiete kilichopo Sao Paulo nchini Brazil. Alikuwa Rais wa Brazil baada ya kuong’olewa madarakani kwa mwanamama Dilma Rousef kwa kura ya wabunge ya kutokuwa na imani naye.  Temer alikuwa wa nane na wa mwisho katika familia yao ya wahamiaji kutoka Lebanon waliofika nchini humo mwaka 1925. Temer alisomea masomo ya sharia katika Chuo Kikuu cha Sao Paulo na baadaye katika Chuo Kikuu cha Kikatoliki cha Pontifical  cha Sao Paulo. Baadaye alitunukiwa shahada ya uzamivu ambayo ilimfanya apande hadhi na kuwa Profesa wa Sheria hususani masuala ya Katiba. Mnamo mwaka 1964 alijiunga na Idara ya Elimu ya Jimbo la Sao Paulo na mwaka 1970 alikuwa mwendesha mashtaka wa jimbo hilo. Mnamo mwaka 1983 aliteuliwa rasmi kuwa mwanasheria mkuu na mwaka uliofuata Temer alikuwa Katibu Mkuu wa Masuala ya Usalama wa Raia wa Sao Paulo. Alijunga na chama cha mrengo wa kati-kulia cha PMDB (Partido do Movimento Democrático Brasileiro) na mnamo mwaka 1986 alikuwa miongoni mwa wajumbe wa bunge la Katiba ambako walitengeneza upya katiba ya taifa hilo mwaka 1987. Pia Temer aliwahi kuwa Spika wa Bunge la Brazil katika vipindi vitatu tofauti 1997–99, 1999–2001 na 2009–10. Mnamo mwaka 2001 alichaguliwa kuwa Rais wa Kamati ya Chama cha PMDB. Mwaka 2009 alitajwa kuwa miongoni mwa wanasiasa wenye ushawishi nchini humo. Kabla hajachukua wadhifa wa kuliongoza taifa hilo alikuwa makamu wa Rais  wa Dilma Rousseff ambaye alikuwa wa chama cha PT aliyeweka rekodi ya kuwa Rais mwanamke kuliongoza taifa hilo. Hata hivyo Temer anakumbukwa kwa tukio la kuoa mwanamke mrembo mwenye umri mdogo ukilinganisha na Temer akimpita miaka takribani 43. Tukio hilo alilifanya mnamo mwaka 2003. Temer alikuwa Rais wa 37 wa Brazil aliingia madarakani Agosti 31, 2016 hadi Desemba 31, 2018.